NSON
Nson u yé kii ? Inyu kii mut a nsal ? B’a mut nyetama nyen a nsal?
Libag
li man mee li ñunda nseñ i nson. Nseñ i nson i bé lôô ndugi i yigil. Nseñ i yigil i bé minson mi môô, le yaani a noñ i jam
weg u salag. Nson u mut binam u mbôdôl ni bisélél a ñôô. Mut binam a nsal inyu
i yônôs ngôñ yéé. Nson u nhôla mut i ba kunde ni i njel ini le, a nla je, a nla
haba mbod ni bitamb, a nla tibla, a nla ôô bisélél gwé, a nla bot mboda i ke
bisu. Nson
u mboñ mut le a nwas libag li mange. Jon u nog le nson u yé nyonyo
mahoñ. Hala wee i ngéda u mbumbul nyen u nyi line li nson. Kikii nson u
tabé bun, jon man mee a bi bot i yom ini le yum, inyule mut wada a nla bé nson
wokiwo ibale bo, bôt béé ba libôg ba nhôla bé nye. Hala a mpamna i ngaba nson, i yi libog nson. Hala a
nhôyôs nson mut a nsal. Yag bisélél mut a ñôô, bi nla hôla nye i nson wéé, bi
salag ki nson u mut, i ngim ma ngéda.
I
ngéda mut a nsal, yag boña wéé a nsal, boña wéé a nkônde yi ni tééda mam ma
mondo. I ngéda mut a nsal, a ngwélél i gwom bi yé libag li mbog bihégél inyu i
bañ i gwom a ntehe le, bi yé nye nseñ inyu niñ yéé. Mut a nhelel libag li mbog
bihégél kikii hihéga, mut a ngwélél bumb inyu i ôô nkwade, hisoo i ke bisu.
Kikii mut a nhelel libag li mbog bihégél, hala ki nyen yag nson u nhelel libag
li mut i pes nyuu yéé, pék ni yi yéé, ngôñ yéé i ke bisu.
Ngim
binuga i nsal. Ngim dinuni i nla oñ jumbul ndi i nla habé sal nson umpe inyu i
yônôs ngôñ yap. Nlélém kikii libôblaga ni nyôi, bi nyi ndigi sal nson wada, ndi
to i heñel wo, bi nyi be. Kikii di ntehe le mut inyu sal a nlama yi gwélél
libag li mbog bihéégél, hala ki nyen nson u gwal liada i pôla bôt. Jon nkol ni môô i gwep. Iloa ngim bôt i bé
minlimil mi bôt bape. Ba bé sal inyu isañ wap nson. Hanano, u gwé biiñngin,
nyoo nyen bilépla bi nsal, ndi nwet iñngin a nsaa bo le kikii sôñ i yé i mal,
le i ngéda ba mal sal ngim nson i ke bisu.
Nson
u nla lona gwét ni i njel ini le, i mut a gwés ba kunde, a ngwés le nson wéé u
hôla i yônôs ngôn ni sômbôl yéé. I ngéda ini mut numpe a ntuga nye i bumbul i
yom a nsal tole a ntuga nye i yônôs ngôñ yéé ni njel nson, sañ i nla juba i ke i
pam i gwét. I yom i, yon di ntehe I pôla biloñ. Ngim biloñ i ngwés le, biloñ
bipe bi séélag bo, ndi bo, ba pôdôg bo i nson wap. Jon u nog le
bana ba hemek toñ, bana ba humlag mamañ. Biloñ bini bi ngwés kahap biloñ
bipe i ngii miño, inyu i boñle, ba yégla libag li mange. Bon ba tamb we nson
woñ, bon ba nkal we i yom u nlama sal ni kikii u sal. Mut kôba nyen a bi kal
le: nsébla u noñ nneebe. Ibale bo
ndi u ngwés ba kunde ni nson u nsal, u yi ni le, bisai bi noñ mange manôgla. Kul nye sañ i bôag bañ, me
tep i wem. Jon a légég u jek, a hol u je kuunjañ. I ngéda mut a nyéñ le bilôg bisañ bi ba kunde, hala
wee a nsal nson Hilôlômbi. Jon u nlama sal le u bagal bañ i yom Hilôlômbi a bi
mma.
Yaônde,
17 biôôm 1999
NKAM PONDI PONDI
http://antoinepondipondi.blogspot.com
