Kék ndutu

Kék ndutu

KÉK NDUTU

 

Di nla kobol i buk ini le kék ni kal le hala a yé ngim ngéda . Jon u nok le : bayi jam bon ba hômôk i kék jal. Hala wee mut a nlama sélés boña wé mangéda momasôna.

 

Di nla kobol i buk ini le ndutu ni kal le hala a yé ingéda u nôgda bé nyuu yoñ longe, ndi i  pamak ki le u nihbe bé i jam li. Jon u nok le: banga mawanda i nyina i kel ndutu . Hala wee ba nok we ngôô, ba nlo i yuuga we. Ndutu i nla bé mal ingéda niñ i yii.

 

Bôt  ba kôba ba bé yi  le  ba nlama añ kaat sôkbôk ni kaat biniigana bi Hilôlômbi. Inyuule Hilôlômbi a yé mapubi, a yé gwéha, a nti nsañ i ke bisu. Hilôlômbi nyen a bi tohol bôt ba kôba i Ngog Lituba le i bôt ba bé jôs bo gwét, ba jubus bañ bo i base baôm mbom isi. Ni maliga ma Hilôlômbi ma nene. Hilôlômbi a ti loñ mee nkoñ, a ti bôt ba kôba yi ni pék le ba ôô bisélél gwap, ba bañ bee gwap, ba sal bidjek gwap ndi ba nuñul bijek gwap, maog map, bisélél gwap ni bee gwap ni nkoñ hisi. Hilôlômbi a yilis bôt ba kôba ngwélés inyuule ba bé  bégés mambén ma Hilôlômbi. Ba bé nigbene  i tôl Hilôlômbi, Ntohol wap.

 

Kii u mboñ hanano inyuu Hilôlômbi? U  nlama  yi i homa u bi nyodne. U nlama yi le  wa kôs ndigi hogbe ibale  u nyi le u bi kôm Hilôlômbi mbus . Nseñ masoohe i yé i hôla we le u  témb yak Hilôlômbi le a ti  we ngui, le u bana  bot-ñem, le u ba bañ wetama. U tééda mambén  ma Hilôlômbi. U yi le man mee a je bañ bijek, a nyo bañ maog   ma loñ i ñane nye tigale a yila nkol i loñ i. Man mee a nuñlene bañ biték gwé mut a tabé man mee. Munlôm a haba bañ mbod mudaa to mudaa a haba bañ mbod munlôm.

 

U sugus masoohe moñ le : Nginda hibee i hi jek batôle.  Hala wee u nti mam moñ Hilôlômbi.

Masoda ni nu a nkil hi kokok.

 

 

Yaônde, 01 hilônde 2014

                                                                                               Nkam Pondi Pondi

                                                               http://antoinepondipondi.blogspot.com

NU A BÉ, NU A YÉ, NU A NLO NI NU A BA

 

 

            Di nla kobol i buk ini le nu ni kal le hala a yé mut to yom ba mpôdôl. Di nla ki kobol i buk  ini le nu ni kal le hala a yé inyuu  nit mut to yom.

 

         Ingéda di nkal le nu a bé hala  a  kobla le bindôndôô  gwé gwon bi ñunda  bés le nyen a yé bibôdle.  Di nla kal le nu a yé hala wee di ntehe i mam a mboñ i len ini. Ingéda di nkal le nu a nlo hala wee di nyi bé kikii kel i ñye. Ingéda di nkal le nu a ba hala wee nyen ane yé ya yiba homa nyensôna.

 

Bôt ba kôba  ba bé sébél ki Hilôlômbi le  NU A BÉ, NU A YÉ, NU A NLO NI NU A BA inyuule Hilôlômbi nyen a yé i boga ni boga. Hala wee Hilôlômbi a yé nu boga.

 

Yaônde, 30  mpuye 2014                                                                                                NkamPondi Pondi                                                               http://antoinepondipondi.blogspot.com

 

 

Mal Kal

MAL KAL

         Di nla kobol i buk ini ni kal le hala a yé i sugus ngim jam,hala a yé i pamna lisuk,hala a yé i mélés ngim jam,hala a yé ki témna mbôô i ke bisu.

         Di nla kobol i buk ini le kal hala wee hala a yé i yibil nyo i pahal to i nôôgaha jam.

         Bôt ba kôba ba bé sébél ki Hilôlômbi le MAL KAL inyuule i jam Hilôlômbi a nkal we li yé nseñ inyuu yoñ.Hilôlômbi nyen a nyi inyuu kii a nkélél we i jam li yak ingéda a ntep le a kal we i jam li.Jon a yé MAL KAL.

                                                                                Yaônde,24 mpuye 2014

                                                                                  Nkam Pondi Pondi

                                                    http://antoinepondipondi.blogspot.com

Mal Yi

MAL YI

         Di nla kobol i buk ini le mal ni kal le hala a yé i pamna lisuk,hala a yé i sugus ngim jam,hala a yé i mélés ngim jam,hala a yé ki témna mbôô i ke bisu.

         Di nla kobol i buk ini le yi ni kal le hala a yé i tééda i boña,hala a yé mboda mam mut a nigil,nok to tehe,hala a yé ngui i noga i ke bisu.Jon u nok le : mut a mal bé yi. U nogok ki le :yi i ngi kônde i ntek bé mal.Hala wee mut a nlama kônde nigil inyuule mut a mal bé yi.Jon u nok le :mut a nyi bé bisu bi mbog.U nogok ki le :u yik len u yi bé yaani.Hala wee mut to wada a nyi bé mam momasôna.Hala wee mut to wada a nyi bé i mam ma gagwéla yaani,ndigi ma a mal tehe len.

         Bôt ba kôba ba bé sébél ki Hilôlômbi ki le MAL YI inyuule mut to wada a nyi bé mam momasôna..Mut nla bé bana  yi i mélés mam.Hilôlômbi nyetama nyen a nyi mam momasôna  .Nyen a yé tén yi.Jon a yé MAL YI.

                                                                               Yaônde,23 mpuye 2014

                                                                              Nkam Pondi Pondi

Hônd kéna

HÔND KÉNA

         Di nla kobol i buk ini le hônd ni kal hala a yé ngim nkuleñ i mbol tjéé,i nkan bie i ke bisu.Di nla ki kobol i buk ini ni kal le hala a yé ngim hiôdôt.

         Di nla kobol i buk ini le kéna ni kal le hala wee mbagi nkaa i mal tina.Di nla ki kobol i buk ini ni kal le ba omb bikule ni kéna.

         Bôt ba kôba ba bé sébél ki Hilôlômbi le HÔND KÉNA inyuule i yom Hilôlômbi a mal kit,mut a nla habé hohol yo,mut a nla habé pénda to timbil mu.Hala wee buk i nsôk.Malkal nu.Mut a nhémle Hilôlômbi a nlama noñ i jam Hilôlômbi a nkit.Inyuule Hilôlômbi nyen a nyi inyuu kii a nkit hala.

                                                                         Yaônde,22 mpuye 2014

                                                                            Nkam Pondi Pondi

                                               http://antoinepondipondi.blogspot.com