BIIBE

BIIBE

Di nla kobol i buk ini le biibe ni kal le hala a yé ngim malép i mpémél i koo i nyuu mut i ngéda a nok lék tole i ngéda a nsal tole i ngéda a nke ni makôô tole i ngéda ngim kon i gwé nye tole i ngéda a nkon woñi i ke bisu.

Malép ma biibe ma gwé bas, ma numb ngim njiñ. Nseñ i biibe i yé le i  nhéya mahindi ma yé i kété nyuu mut. Jon i ngéda biibe i mpam mut, i mut nunu a yi le a nlama nyo malép i nyuu i yiha malép ma mpam nye i biibe.

Biibe i yé mintén maa. Mut a nok lék tole a nyigis nyuu. I biibe i  i ta bé be. Ndi mut a  mpam biibe  inyuule a nkon ngim kon kikii bo lihep i nwet nu i mbat le ba bénge nye, ba tibil nye. Tole a nkon woñi.

Yaônde, 18 maye sép 2019

Nkam PONDI PONDI

http://antoinepondipondi.blogspot.com 

TÉN LÉP

TÉN LÉP

Di nla kobol bibuk bini le tén lép ni kal le hanyen malép ma mbôdôl pémél. Malép ma nla pémél hisi tole liaa. Bôt ba mbôngôl lingen inyuu i nyo malép ma mpôp. Mut a nlama bé ha mahindi lingen.

Tén lép a yé bebee le nlélém buk kikii ño lép. Ño lép i nhôla we i yi nwel lép, hala wee kikii lép i nkuli.

Yaônde,18 maye sép 2019

Nkam PONDI PONDI

http://antoinepondipondi.blogspot.com 

LIBÔK LI NKUMDUM

LIBÔK LI NKUMDUM

Di nla kobol i buk ini le libôk ni kal le a  yé liyééne, u yé u hômôk, u hômôk, u ke u yén libôk  joñ.

         Di nla kobol i buk ini le nkumdum ni kal le hala a yé ngim bee i mil we ibale bo u nkwo mu. Yon ba nsébél ki le soñ kum  tole kôm  nyoo. Hala wee u kwo mu, u mbet habé. Bee i ngi libôngô.

Bôt ba kôba ba bé sébél ki Hilôlômbi le LIBÔK LI NKUMDUM hala a yé liyééne li Hilôlômbi.

Yaônde, 28  mpuye 2014

                                                                                          Nkam Pondi Pondi

                                                          http://antoinepondipondi.blogspot.com

HIÑG TOLE NKOÑBE

HIÑG TOLE NKOÑBE

Nkon unu u nlôl i nut i laakôp i jôl ni i ngoñoo. Jon jôl li nlek, li nyip njel mbebi i mpémél. Hanyen a mboñ we le u nhép habé longe tole ngoñoo i mbabaa we. Yon i nlona kôhôl. (libom li pamak).

	Yaônde, 12 maye sép 2019 Nkam Pondi Pondi http://antoinepondipondi.blogspot.com

 

KUNDE I SÉGI

KUNDE I SÉGI

            Di nla kobol i ño buk ini le kunde i ségi ni kal le hala wee ngim loñ  i yé kunde bibép bi nyo  ndi i loñ i ngwés yilis yo wañ yon i ngii annge i loñ i. Ni i njel ini le i loñ kunde i ségi, bon ba loñ i  ba mpot hop u loñ i ñane loñ yap, bon ba loñ kunde i ségi ba nnigil mbog ni  mayi ma mbog ma loñ i njélé loñ yap. Bon ba loñ kunde i ségi ba ñôô bé bisélél gwap, ba mbañ bé bee gwap, ba mbañ bé  moni wap. Nyunga i yé i moo ma bon ba loñ i ñane loñ kunde i ségi. Bon ba loñ kunde  i ségi ba nhémle Nyambe nu loñ i ñane loñ yap ndi ki man mee a nkéne ngén le : i yoñ sat u nyi, yon u tôgbene. U nogok   ki le : ba nkés bé mbog i ngii mbog . Bon ba loñ kunde i ségi ba  nhoñol le bilonge bi mam bi nlôl i loñ i ñane loñ yap. Ba nje bijek, ba nyog maog ma  loñ i ñane loñ yap . Jon i ngéda u nkena mahoñol ma mut, u tôñ bañ ni maboñok mé inyuule i mut nunu a ga boñ ndigi i mam u mbemb le a boñ, hala wee a mboñ mam ni niñ kikii mut a nyi le u nloo nye. Jon a nla bé ôt mahoñol ni nyemede, a ngi gwé libag li maange.

            Jon kunde i ségi i nkobla le bon ba loñ ba ngi yii minkôm. Ba nla bé yoñ ngim makidig kikii bon ba loñ i yé kunde . Ba nyi bé kii i yé sôkbôk i sép hala wee libogog li mam momasôna ma yé sép inyuu ngim loñ i yé kunde.

Yaônde,05 maye sép 2019

Nkam Pondi Pondi

http://antoinepondipondi.blogspot.com

MATÉYAK MA MBÉN

MATÉYAK MA MBÉN

Ministère public	= Lôñ i batad mambén
Sursis	= Litéé kokse
Disposition	= Litiñ li mbén
Promulguer	= Liyis mbén
Infraction	= libôg mbén
Amnistie	= Nwéhél i mbén
Grâce	= Nwéhél i nkena loñ
Mesure de sureté	= Likéñ
Juridiction	= Bikéhene
Sceau de la République	= Sitam sap i loñ
Conspiration	= Jim libe
Ordre public	= Mbog
Légalité	= Likil hi kokok i mbén
Cas fortuit	= Héhla jam
Force majeure	= Yom i nkéñ we i boñ ngim jam
Confiscation	= Kadal
Libération conditionnelle	= Lipam  i mog ni ngim makidig
Récidive	= Litiimba bôg mbén
Procès verbal	= Manut
Mandat de dépôt	= Oda i tééda mut
Mandat d’arrêt	= Oda i  gwel mut
Mandat d’amener	= Oda i lona mut
Mandat d’incarcération	= Oda i ha mut i ndap mog
Mandat d’extraction	= Oda i pémés mut i ndap mog i ke bikéhene

Yaônde, 21 matumb 2016

Nkam Pondi Pondi

http://antoinepondipondi.blogspot.com

YÔDÔ

YÔDÔ

Di nla kobol i buk ini le yôdô ni kal le hala a yé yom i yii wanda, i téésép, i gwé bé bitoñ to matut. Jon yôdô i yé lama.

I buk i le yôdô i nlôl i jañ le yôdô jañ tole nsôdô i jañ.

I ngéda ba nkal le  yôdô  mudaa, hala wee lama yé i mbôdôl i tjôñ di ño i pam dinoo di makôô.

Yaônde, 25 biôôm 2019

Nkam Pondi Pondi

http://antoinepondipondi.blogspot.com

MAKELE

MAKELE

         Hala a yé ntén hiôs u nkôp mut ni nyuu yosôna.Himamana i pog i nsoñ won i nti i kon unu. Makele ma mbéna kon boonge ba titigi. I kon unu u nnoña. Inyuu i semba i kon unu, u nkeeba makele.

         I mut a nkon makele a nlama tehe mut matibla inyuu i tiina nye bee. Makele ma nkon bé mut ngélé i baa.

        

Yaônde 21 biôôm 2019

Nkam Pondi Pondi

                                                  http://antoinepondipondi

DIKOLA

DIKOLA

         I kon unu u mbéna gwel boonge téntén. Ditjonjee di matai di nnut, u ntehe hala i mang mi mut.

         Dikola di yé kon u nnoña, u nla yilis maange munlôm wéya. Jon mut a nlama ke i tehe mut matibla le a tiina nye bee.

        

Yaônde 21 biôôm 2019

Nkam Pondi Pondi

http://antoinepondipondi.blogspot.com

TJÔS

TJÔS

         Hala a yé ngim kon i koo nyuu i nlôl miñyin mi himamana bon ba bitandi tole biômb bi ntôp koo ndi bi nyee matjee map. Mon ma nta i nyuu mut ndi ma nyañag mut ngandag.

         Tjôs di yé kon u mahindi le mut a nla semba wo ingéda a mbéna nogop ni sobe bititigi gwobisôna ngélé yada i ngim kel.

         U nlama ke i tehe mut matibla le a tiina we bee i ngéda u nkon.

        

Yaônde 21 biôôm 2019

Nkam Pondi Pondi

http://antoinepondipondi.blogspot.com

LIBIMBE

LIBIMBE

         Hala a yé ngim kon i mbôdôl i kété nyuu ndi i yiga pam munu i koo nyuu ni ngim tjôs.

         Libimbe li yé kon u nnoña. U nla sema kon libimbe i ngéda u nkeeba.

         I ngéda u nkon libimbe, u nogop ni sobe, u hoobaga mbon môô.

Yaônde 21 biôôm 2019

Nkam Pondi Pondi

http://antoinepondipondi.blogspot.com