Nwet ngii ni hisi

NWET NGII NI HISI

   Di nla nkobol ibuk ini le nwet ni kal le hala a yé mut yom to gwom bi yé i gwé.Jon u nok le :li lama hee !u bat nwet.Hala wee u be bañ jam li mut le li yé lilam we ngi bat nwet.

   Di nla kobol i buk ini le ngii ni kal le hala a yé homa sôñ,jop li hañngaa ni tjôdôt bi yé i ke bisu.Hala a yé homa yom i yéne.Jon u nok le :hikii mbai i gwé wéé ñem ngii.

    Di nla kobol i buk ini le hisi ni kal le hala a yé biték,hala a yé lisélél li wom hala ayé nkoñ,hala a yé lipan i ke bisu.Ba njul bôt ikédé hisi.

   Bôt ba kôba ba bé sébél ki Hilôlômbi le NWET NGII NI HISI inyuule ngii i yé haa ni hisi.Hilôlômbi nyen a bi heg ngii ni hisi.Ngii ni hisi bi tihba bé.Jon Hilôlômbi nyen a yé NWET NGII NI HISI.Nyen a nyi inyuu kii a bi heg ngii,a heg yak hisi.Ngii ni hisi bi yé gwom bi Hilôlômbi.Nyen a bi heg gwo.Jon a yé NWET NGII NI HISI.

                                                                              Yaônde,14 mpuye 2014

                                                                              Nkam Pondi Pondi

                                                    http://antoinepondipondi.blogspot.com 

                                                                                             

Mal mam

Di nla kobol i buk ini le mal ni kal le hala a yé i pamna lisuk,hala a yé i sugus ngim jam,hala a yé i mélés ngim jam ,hala a yé ki témna mbôô i ke bisu.

         Di nla kobol i buk ini le mam ni kal le hala a yé jam li yé ngandag.Jon u nok le :man kaa a yi he jam,wee a nla mimbabada.Hala wee u nlama ntibil emble ibale bo u ngwés bana pék.U nogok ki le :diñwagle i nwemel si,wee jam li yé ha.Hala wee mut a mpule bé ba homa ngi banga jam.Hala wee ba podog mut mam,wee ba ntehe nye ni jam.Hala wee mut a gwelek mam mabe,wee a yé béba mut.U ba bé ni jam,ba bot bé we jam ?Hala wee ibale bo u mboñ bé jam,bôt ba nla  ode we jam li u nyi  bé.

         Bôt ba kôba ba bé sébél ki Hilôlômbi le MAL MAM hala wee nyetama nyen a nla mélés mam momasôna.Nyetama nyen u nlama bana bôdôl,nyetama nyen u nlama biine mam moñ inyuule nyen a bi mal heg ngii ni hisi ni gwom gwobisôna.Jam to jada li ta bé MAL MAM nkén.

                                                        Yaônde,14 mpuye 2014

                                                        Nkam Pondi Pondi

                    http://antoinepondipondi

Mbep

MBEP

            Di nla kobol i buk ini ni kal le hala a yé nhiñil mbog.Hala wee mut a nlo i mbep tole mut a nlo i nhiñil mbog.Hala a yé mut a nyéñ i yi mam ma sôli ma ngim loñ ni njei puhe inyuu nseñ i loñ ipe.Jon u nok le : ngwégwét man lôg Basangén a ba ke  i jo gwét biloñ,a yi bé gwo ndi a yik makanda.

            Yom di nyi,yo ini le,mut a nla lo i mbep i yi mangaa ma loñ ipe,i yi lelaa ngim biiñngin i ñôô ngim bisélél,ngim bee,i yi lelaa i loñ i,i mbok ane yé,i yi bilem bi ngim mut i ke bisu ni njel matjañ.

            I len ini,ngim bisélél i nlo i mbep kikii puuwene,nsinga i woo,ndes manwin,sitima,kei ba nleñ i bôdôl i nkoñ biték le i kiiña hisi i ke bisu i añ matila moñ,i tehe i homa u yé ni i noñ maké moñ i ke bisu.

            Mbep i yé nuga i nhôm i nwom mi bôt ngi ni kunde yap.Jon hikii mut a njôp i homa kunde i ntina bé nye ndi a lok i téénga,ba nhékda nye kikii i nuga ini le mbep.

                                                        Yaônde,12 mpuye 2014

                                                        Nkam Pondi Pondi

                                      http://antonepondipondi.blogspot.com

Manôgla

Hilo hi mim

  HILO HI MIM 

Di nla kal le hala a yé mut a yé ngim hilo i mboñ nye le a nok habé njôhge,a nla habé gwélél moo mé to makôô mé yak yi i mal nye le a nyi habé i homa a yé,i niñ a niñ,i mam ma ntagbe to ma ngwéla i pañ yé to haa ni nye i ke bisu .I ntén hilo unu u nlo ingéda njok kon i nkahal tiigaha mut i nyemb.Lehel ñem i nkahal nene.Bapala hop ba kahal tulus homa nyensô le mut nu a niñ habé.A ma jôp i pôla bikôdôg ni lipan.Ndi yak bôt ba wip ba gwé likenge i gwélél mabui to gwom bipe i jubus bôt hilo hi mim.                                                    

Ngim bôt i ngwélél ngim libui i,i nhôla bo le ba jôp i ndap mut le ba nip.I bôt ba yé mu ikété ndap i,ba nke hilo hi mim le ba nok bé bôt ba wip ba njôp i ndap.Hanyen bôt ba wip ba nla héya we i nañ yoñ,ba niñ we isi,u yi bé hala i ke bisu.

 

                                                                             Yaônde,12 mpuye 2014

                                                                               Nkam Pondi Pondi

                                               http://antoin

MANÔGLA

 

Di nla kobol i buk ini ni kal le hala a yé kiha ntôñ. Jon u nok le man a nlama nôgôl bagwal bé.

 

Di nla ki kobol i buk ini kal le hala a yé likwo kiñ yada. Jon u nok le me ni we di nôgla maben. Hala a nkobla le i yom u mpot tole i yom u mboñ mut numpe a nok yo inyuule i ta bé nye nkén. Jon bôt ba nla nôgla i hop, i mis, i moo i ke bisu. Jon u nok le: man bo nyañ ba nyégna bé. Hala wee man a nyi i yom nyañ a ngwés yak nyañ a yik i yom man a ngwés. Hala wee man a nyi mahôñôl ma nyañ yak nyañ a yik mahoñol ma man.

 

Manôgla ma mboñ bôt le ba kee ni bisu noñnaga ni i jam ba nkit le ba mboñ inyuule ba nkôhna bé woñi bo ni bo. Manôgla ma nlona bôdôl ñem ni nsañ. Manôgla ma nlona mahol i ndap bôt, litén, i loñ i ke bisu.

 

Yaôndé, 05 mpuye 2014

 

NKAM PONDI PONDI

http://antoinepondipondi.blogspot.com