A Légég u jek, a hol, u je kuunjañ

A Légég u jek, a hol, u je kuunjañ

Di nla kobol i ngén ini ni kal le u nlama boñ jam ingéda i kôli le li bôña. Hala wee u nlama hoo bôñôl jam i ngéda, i ba bé tiñha, tiga le i jam li li ôbi. U nlama yônôs ngôñ yoñ, ñem woñ u nlama yon ingéda u mboñ jam u ngwés. Jon u nog le, mut a ntus tum. I jam li mbénge we, u nlama bôdôl jo wemede. Jon u nog le, masôôhbe i béé i yoñ ti. Ingéda u mboñ jam i ngeñ i kôli, u nkôs matam. Jon u nog le, i ngôi i mpule i tén njap, yon i nje soso litam. Ibale bo ndi u mboñ jam, boñ i mam momasôna ma mbéda mu ibale hala a mbénge we. Jon u nog le, joo li kôp ni ño lilambag jada.

Ingéda u mboñ jam i ngéda i kôli, hala a ñunda le u tabé mut yubda. Hala a mboñ le u niñ ni nsañ, u yé mbôô minsôn nwoñ ni mahoñol moñ. U niñ ikété libag li maséé. Hala a yé kimasoda.

Yaônde, 02 mpuye 2010

Nkam Pondi Pondi

http://antoinepondipondi.blogspot.com

PIL I LOÑ

PIL I LOÑ

Ingéda ngim loñ i nkit le i nséñ minloñ, i ñoñ mandap ma sukulu, bilap bi bisai, I nti bon ba loñ linyuma ni longe malép i ke bisu, i loñ ini i nla bat kôle moni inyu i sal i nson unu. Loñ i nla bat kôle moni biloñ bipe, dikuu di moni di biloñ bipe i ke bisu. Ndutu i nla pam ibale bo ndi loñ i nla habé yônôs likak li timbis moni. Bakén ba loñ ni dikuu tjap di moni bi nla ane loñ i mpôôs moni ngim mbañ tiga likot moni inyu i saa pil wé. Kikii hihéga ngomin a nla habé yoñ bôt i nson, a nla habé bédés minsaa mi bôt ba nsélél nye, a nla habé hôla biiñngin bi nke bé longe i ke bisu. Jon u nog le, minkok mi nsok yôngôô.

Ndi ngim loñ i nla tjél bat kôle moni bakén ba loñ ni dikuu tjap di moni. I ka ngéda i, i loñ ini i mbat kôle dikuu di moni di loñ ni minhat mi bon ba loñ. Hala a mboñ le loñ i nla kôle libim li moni i ngwés ni nôgla yéñe i pil wé. Loñ i nkit yéñe i kôli le dikuu di moni di nlama ti i bôt ba ntééda moni wap dikuu di moni di loñ. Hala a mboñ le bon ba loñ ba ntééda bé moni wap biloñ bipe. I moni nunu a nyégle i loñ yap. A hôlga bon ba loñ ba gwé ngôñ ni kôle moni yag ngomin.

I ntén loñ ini i ntééda libag jé li ngwélés.

Yaônde, 13 mpuye 2010

Nkam Pondi Pondi

http://antoinepondipondi.blogspot.com

B’A LINÔGLA BIBUG LI NLIBANA MAHOÑOL?

B’A LINÔGLA BIBUG LI NLIBANA MAHOÑOL?

Di nla kobol linôgla bibug ni kal le hala a nla nene ni likee hop longe, ni nkwel hilémb, yag i moo, yag i mis i ke bisu, i nya yé le manôgla ma nene ikété bôt ni i njel ini le bobasôna ba nog i yom jô yap i ngwés kal bo.

Di nla kobol i bug ini le nlibana ni kal le hala a yé yom i yé nkoda, jam li nkéñha bôt i ke bisu. Jon i mut a yé maliga a nyéñ le mahoñol ma hikii mut ma kiha ni linôgla bibug to ibale bo i jam li, li nlet. Inyule bibug bi ñunda mahoñol ma mut, libag li mut i ke bisu. Hala a nlet le mut a nyi mahoñol ma mut numpe. Inyule bôt bobasôna ba gwé bé nlélém yi to nlélém mahoñol. Jon u nog le, mahoñol ma nlôl bé bebee.

Inuyu hala nyen linôgla bibug bi nla libana mahoñol ni i njel ini le mut a nla bé yi ngobol bibug bi mut numpe tole mut a nla bé nog i yom mut numpe a gwéhék kal i ke bisu. Bug yada i nla bana ngandag ngobol. Jon i tabé bun le mut nyensôna a nla yi ngandag ngobol i ngim linôgla bibug.

Yaôndé, 13 matôp 2010

Nkam PONDI PONDI

http://antoinepondipondi.blogspot.com

liens youtube

lien youtube

les vidéos depuis Avril 2010 aux adresses suivantes: http://www.youtube.com/view_play_list?p=9CD1FBB337DECA87
Toutes les vidéos culture basaa http://www.youtube.com/my_playlists?pi=0&ps=20&sa=0&dm=0&p=D8DC1F56D172C86B

MBéNA JE a MBéNA Bé BA BANGA MUT

MBéNA JE a MBéNA Bé BA BANGA MUT

Ingéda ba mpot mut hala wee bisol bi. Inyule i mut a ngwés je ba yé ba ti nye bijek, wee ba ñyuu nye. A mpot habé maliga. A mpot i yom mut a nti nye bijek. I yom a nkal nye le a pot, yon a mpot inyule a ntôñ le yaani a ti habé nye bijek.

I mut a mbéna je, a mbéna hép ingéda a ntehe bijek. Ndi hala a tabé longe lem inyule i mut a yé ngwélés, a nlama yét.

Yaônde, 13 matôp 2010

Nkam PONDI PONDI.

http: //antoinepondipondi.blogpot.com

NEEBE

NEEBE

Di nla kobol i bug ini ni kal le hala a yé mut a nkit mahoñol mé ni maboñog mé i boñ ngim jam. Jon mut a nla neebe le Hilôlômbi nyen a yé Ntohol liten li mee inyule nyen a bi hôla jo i yémbél i bôt ba bé jôs litén li mee gwét i Ngog Lituba. Jon Hilôlômbi a bi ti Bambombog ba nyi nye ngui le ba sayap bon ba mee, ni ki le, i man mee a nkôs bisai bini a mbet ndigi bet ni bet to ibale bo a nneebe bé Hilôlômbi inyule Bambombog ba nsayap nye, ba nneebe Hilôlômbi. Litén li mee li nla niñ ikété nsañ, gwéha, mahol ingéda li nneebe Hilôlômbi. Inyu hala nyen a bi ti man mee yi ni pék i ôô bisélél gwé, bee gwé i ke bisu ingéda i man mee nunu a nneebe ke ni Hilôlômbi. Inyu hala ki nyen mut a nla neebe gwélél Hilôlômbi. Mut a nla neebe libag jé li nkol. Jon u nog le, to me je mbiñmbiñ, to me je mbañmbañ, me yé ndigi nkol i Mamug ma Njambe. Mut a nla neebe le niñ yé i yé ntééyag i ke bisu. Ngim muda i nla neebe le i sém nyen a yé nlô wé i ke bisu. Maange a nla neebe le a mboñ sukulu i ke bisu. Mut a nla neebe lipém, bibégés, nwéhél, likébél, tel i nson i ke bisu.

Mu i njel i nyen i yé longe le u neebe bañ, i loole u neebe ndi u nla bé yônôs i jam u neebe. Inyule i ka ngéda i, u nyila nyômôg mut. Mut bôt ba nyan, mut a nyét bé i ke bisu.

Yaôndé, 20 matôp 2010

Nkam PONDI PONDI

http://antoinepondipondi.blogspot.com

NYEMB I NNOLA BÉ

NYEMB I NNOLA BÉ

Hikii mut a gwé i wé nkôm kel. Jon di waa kon nyemb woñi inyule mut a ngwé, a niñ ndi a wo. Di bana habañ mahoñol mabe inyu i niñ longe niñ, inyu i bana niñ lam. Di nlama yeñ i bana sôkbôk maséé. U boñ le hikii jam li mpémél we, u tehe i longe i yé mu. Hala a mboñ le u nyi kéñ boña woñ. Inyule boña a yé a wo, wee mut a nwo.

Jon u waa ôm maasoñ nsohi, u béna bénge le i yom i mpémél we, b’a we bé nyen u nsuu i yom i? I ke bisu. Jon u nog le, yôi a kal njéé, nye a njéé ké, béñgba, ibale bo u mbéñgba bé, kindba.

U nlama ba maséé ni mam malam u mboñ i niñ yoñ. U tééda le nyemb i yé lisuk li niñ li hikii mut. Jon u nlama bé kon nyemb woñi. I mut a yé ngwélés a nkon bé nyemb woñi inyule nyemb i nnola bé ndi kon won i nnola.

Yaôndé, 13 matôp 2010

Nkam PONDI PONDI

http://antoinepondipondi.blogspot.com