Pot li mal

POT LI MAL

 

         Di nla kobol i buk ini le pot ni kal le hala a yé i pémés i nyo woñ jam u nhoñol,hala a yé i kal mut numpe mahoñol moñ i ke bisu.

         Di nla kobol i buk ini le mal ni kal le hala a yé i pamna lisuk,hala a yé i sugus ngim jam,hala a yé i mélés ngim jam,hala a yé ki témna mbôô i ke bisu.

         Di nla kobol pot li mal ni kal le hala a yé mahoñol ma mpam lisuk le mpénda a ta bé,le i yom i mpam i nyo yon i mbôña,hala wee pot ni boñ bi yé jam jada.

         Bôt ba kôba ba bé sébél ki Hilôlômbi le POT LI MAL inyuule i yom a mbôn a nyônôs yo,a mpot mpaha,a mpot bé miseebe.Jon bôt ba kôba ba bé nigbene i tôl Hilôlômbi,ba bannga banga bot-ñem ni Hilôlômbi ni Hilôlômbi a bé i ñem i hikii man mee.

                                                                      Yaônde,14 mpuye 2014

                                                                      Nkam Pondi Pondi

                                          http://antoinepondipondi.blogspot.com

Nkindil hisi

NKINDIL HISI

         Di nla kobol i buk ini le nkidil ni kal le hala a yé mut a mbudul yom,a nyibil yom,a nti yo niñ i ke bisu.

Di nla kobol i buk ini le hisi ni kal le hala a yé biték,hala a yé lipan,hala a yé nkoñ,hala a yé lisélél li wom i ke bisu.Ba njul bôt ikédé hisi.

         Bôt ba kôba ba bé sébél ki Hilôlômbi le NKINDIL HISI inyuule nyen a bi ti bo yi ni pék le ba laa sal bijek gwap,le ba yi gwélél lingwañ li hisi kikii bumb,gôl,mpuma,mamuna,muli,lingénd inyuu i ôô bisélél gwap,bie ni mabui inyuu i bañ bee gwap i ke bisu.Ingéda mut a nkindil ngim yom,hanyen a nla tehe i yom i yé ikédé yom i,hanyen a nyi i yom i yé ikédé yom i.Jon u nok le :ñyéé i nke bé mañan matehe ngwé.Hilôlômbi nyen a bi hôla bôt ba kôba le ba tehe lingwañ li hisi,hala wee ba ba bañ ikédé jiibe li ndim,hala wee Hilôlômbi a bi hôla bôt ba kôba le ba tehe mapubi,le ba ba i pes mapubi ma yéne iyuu i boñ le ba ba ngwélés,le ba niñ longe niñ i ke bisu.

                                                                             Yaônde,14 mpuye 2014

                                                                              Nkam Pondi Pondi

                                                   http://antoinepondipondi.blogspot.com

Nwet ngui yosô

NWET NGUI YOSÔ

                  Di nla kobol i buk ini le nwet ni kal le hala a yé mut yom to gwom bi yé i gwé.Jon u nok le :li lama hee !u bat nwet.Hala wee u be bañ jam li mut le li yé lilam we ngi bat nwet.

                  Di nla kobol i buk ini le ngui ni kal le hala a yé ngap i boñ jam to mam.Ngui i nene ingéda ngim mut,ngim loñ to ngim yom i ñénél mut numpe,loñ ipe to yom ipe i boñ ngim jam.Jon u nok le :pôndôl i yôñlak i janda.Hala a yé yimbne ngui.

                  Di nla kobol i buk ini le yosô ni kal le hala a ntôla,hala wee to homa a nyégle habé.

                  Bôt ba kôba ba bé sébél ki Hilôlômbi le NWET NGUI YOSÔ inyuule ngui yé i mpam homa nyensôna,i nene homa nyensôna.Jon bôt ba kôba ba bé ba gwééne Hilôlômbi bot-ñem le mut nyekinye a nla bé tuga nye i boñ i jam a bi bôn bôt ba kôba le a bôñôl bo.Bôt ba kôba ba yik le NWET NGUI YOSÔ hala wee ba bé tehe mbimba Hilôlômbi.

                                                                                Yaônde,14 mpuye 2014

                                                                                  Nkam Pondi Pondi

                                                   http://antoinepondipondi.blogspot.com

Nwet ngii ni hisi

NWET NGII NI HISI

   Di nla nkobol ibuk ini le nwet ni kal le hala a yé mut yom to gwom bi yé i gwé.Jon u nok le :li lama hee !u bat nwet.Hala wee u be bañ jam li mut le li yé lilam we ngi bat nwet.

   Di nla kobol i buk ini le ngii ni kal le hala a yé homa sôñ,jop li hañngaa ni tjôdôt bi yé i ke bisu.Hala a yé homa yom i yéne.Jon u nok le :hikii mbai i gwé wéé ñem ngii.

    Di nla kobol i buk ini le hisi ni kal le hala a yé biték,hala a yé lisélél li wom hala ayé nkoñ,hala a yé lipan i ke bisu.Ba njul bôt ikédé hisi.

   Bôt ba kôba ba bé sébél ki Hilôlômbi le NWET NGII NI HISI inyuule ngii i yé haa ni hisi.Hilôlômbi nyen a bi heg ngii ni hisi.Ngii ni hisi bi tihba bé.Jon Hilôlômbi nyen a yé NWET NGII NI HISI.Nyen a nyi inyuu kii a bi heg ngii,a heg yak hisi.Ngii ni hisi bi yé gwom bi Hilôlômbi.Nyen a bi heg gwo.Jon a yé NWET NGII NI HISI.

                                                                              Yaônde,14 mpuye 2014

                                                                              Nkam Pondi Pondi

                                                    http://antoinepondipondi.blogspot.com 

                                                                                             

Mal mam

Di nla kobol i buk ini le mal ni kal le hala a yé i pamna lisuk,hala a yé i sugus ngim jam,hala a yé i mélés ngim jam ,hala a yé ki témna mbôô i ke bisu.

         Di nla kobol i buk ini le mam ni kal le hala a yé jam li yé ngandag.Jon u nok le :man kaa a yi he jam,wee a nla mimbabada.Hala wee u nlama ntibil emble ibale bo u ngwés bana pék.U nogok ki le :diñwagle i nwemel si,wee jam li yé ha.Hala wee mut a mpule bé ba homa ngi banga jam.Hala wee ba podog mut mam,wee ba ntehe nye ni jam.Hala wee mut a gwelek mam mabe,wee a yé béba mut.U ba bé ni jam,ba bot bé we jam ?Hala wee ibale bo u mboñ bé jam,bôt ba nla  ode we jam li u nyi  bé.

         Bôt ba kôba ba bé sébél ki Hilôlômbi le MAL MAM hala wee nyetama nyen a nla mélés mam momasôna.Nyetama nyen u nlama bana bôdôl,nyetama nyen u nlama biine mam moñ inyuule nyen a bi mal heg ngii ni hisi ni gwom gwobisôna.Jam to jada li ta bé MAL MAM nkén.

                                                        Yaônde,14 mpuye 2014

                                                        Nkam Pondi Pondi

                    http://antoinepondipondi

Mbep

MBEP

            Di nla kobol i buk ini ni kal le hala a yé nhiñil mbog.Hala wee mut a nlo i mbep tole mut a nlo i nhiñil mbog.Hala a yé mut a nyéñ i yi mam ma sôli ma ngim loñ ni njei puhe inyuu nseñ i loñ ipe.Jon u nok le : ngwégwét man lôg Basangén a ba ke  i jo gwét biloñ,a yi bé gwo ndi a yik makanda.

            Yom di nyi,yo ini le,mut a nla lo i mbep i yi mangaa ma loñ ipe,i yi lelaa ngim biiñngin i ñôô ngim bisélél,ngim bee,i yi lelaa i loñ i,i mbok ane yé,i yi bilem bi ngim mut i ke bisu ni njel matjañ.

            I len ini,ngim bisélél i nlo i mbep kikii puuwene,nsinga i woo,ndes manwin,sitima,kei ba nleñ i bôdôl i nkoñ biték le i kiiña hisi i ke bisu i añ matila moñ,i tehe i homa u yé ni i noñ maké moñ i ke bisu.

            Mbep i yé nuga i nhôm i nwom mi bôt ngi ni kunde yap.Jon hikii mut a njôp i homa kunde i ntina bé nye ndi a lok i téénga,ba nhékda nye kikii i nuga ini le mbep.

                                                        Yaônde,12 mpuye 2014

                                                        Nkam Pondi Pondi

                                      http://antonepondipondi.blogspot.com

Manôgla