TA A KAL ME LE

Ingéda u nleñ tômblô isi, i mbôô kikii kangéda libañak jéé. Kunde loñ i nsôk ingéda loñ i nyep ni jis li mbôngôô. Hala wee loñ i neebe i ba isi ane loñ i pe i pes i moni, bigwel moo, bisélél, bee, hop, mambén, bijek, maog, base, hémle i ke bisu.Hala a yé nlélém inyuu mut binam.

Mut a nla bé ba ngwélés ibale bo ndi a nyi bé i yom isañ a bi kal nye. Hala wee ibale bo a nyi bé mbog kôba ni kwañ i nsañ. Mbog kôba i yé i mam bôt bakô ba  bi bog ingéda ba bi yémbél gwét i Ngog lituba ni i bôt ba bé gwés le ba jôp i base i ôm mbom isi. Mbog kwañ i yé mam basôgôl boñ ba bi bog ingéda ba bé i loñ Egiptô. Jon i mut a nkal le ta a kal me le ndi i ta wé nu a lôlak i loñ i ñane loñ yé a yi le a nla bé ba ngwélés to loñ yé i nla bé ba kunde. Jon u nog le: ba nkés bé mbog i ngii mbog. Hala wee i yañan mbog i nla bé kiha ni mbog yoñ. Hikii mut a gwé ngim lingwañ ibale bo a gwé mahoñol ma bôt bé ba kôba. Loñ yoñ i nla ba kunde ingéda wemede wa yi i mam isoñ a bi kal we. Hala wee u mbôdôl ôt mahôñol moñ ni wemede, u mbôdôl tehe nkoñ hisi ni mis moñ i ke bisu. Jon u nog le: ñyéé i nke bé mañan matehe ngwéé.

Inyuu hala nyen u nlama yéñ i bana yi yosôna ni pék yosôna i nsoñ.Hanyen wa yi ôô bisélél gwoñ, u yi bañ bee gwoñ, u yi sal bijek gwoñ, u yi nson u nyunga i ke bisu.Ndi we u kônde gwo ni i mam u niñ i len ini. Inyuule yi i ngi kônde i nteg bé mal. Ingéda u ngwés wemede ni loñ yoñ nyen u nyéñ ni yi le : ta a kal me le, inyuu i boñ le u ba bañ wañ mut. Mut nu a gwé bé minkañ mi yé ñômôg isi. Ta a kal me le : hala a yé maboñog,  masalag, mabogog ma mam isoñ ni basôgôl boñ ba bé boñ. I mam mana mon ma hôla we le u kee ni bisu. Jon u nog le : ibale bo u nke bé i kand mbôl ni isoñ u mbolnleñ i nyôl ni pahge.Mbôl i yé lisee li njang. Yon ba nkand ni nkwade bikai. Ba nkañ soso jomb, yon ba nsébél le kôngô i mbôl. Yon ba nsuha i homa maoñ.Ba ñat masee, ba tôbôg bakale, ba nyuugege le i yila ndigi yom yada.Ndi ba leñ wo i ngii, bôt ba leege wo i ngii. Ba mpamna wo i ñond. Hanyen u nsugul.Nyôl i gwé bipes bi baa.Hanyen ba ntôôma bipes bi gwo bi baa. Ba hô ni libuda. Libuda li nyôl, ba mboñ lisee li pe, ba ñôt yo, li nyila kikii libam.Hingônd hi nyôl, hanyen ba mbiine libuda inyuu i boñ le nop a jôp bañ.Ba nkés bikék i ngii le mbebi i bada bañ libuda. Ba nha minkôô i kété ni i mbégdé le mbébi i bada bañ libuda. Ibale nyôl i ñun hanyen nop a mbôdôl jôp i ndap. Hala a mbat jôga li nwi. Likand mbôl li yé ngim likenge basoñ ba niiga we.Ibale bo u nyi bé u mboñ hihôha. Hihôha hi hon hi mboñ we le u nkand mbôl ni pahge.

Masoda ni nu a nkil hi kokok.

Yaônde, 12 maye sép 2012
NkamPondiPondi
http://antoinepondipondi.blogspot.com