HILÔLÔMBI

HILÔLÔMBI

 

Niñ i mut ingéda kôba i bé niñ i woñi. Mapan mabé ma yii minlanga mi mapan, ma bag ki ikédé jiibe. Bie bi bé minténdée ngandag. Basoso ba dikôa ba bé. Dikôa dipe di pémhag hiéé tole hida. Binuga bi keñi bi bé kikii njéé, njok. Ndap mut kôba i bé bé ñoñog ni ngui, jon ingéda a ñoñ ndap, a mban ndugi yo le bie bi  kwél bañ i ndap yéé. Gwom kikii bo mbambat bi bé kôhnaga woñi. Di nla kal le ngi-yi i bé ki ha ingéda i.

 

I niñ i yon i bi boñ bo le ba jôp i amb manyuu map ndi ba bôdôl sélél ni hémle ngui i i nhôla bo i kéñ bo le ba niñ longe. Le ba kon habañ woñi. I ngui i, i nsébla le : Ngé, Um, Njék, Ngambi i ke bisu.

 

To hala, mut kôba a tehe le ngim gwom ipe i yé kikii balom ba keñi, tjôdôt, nyemb, i ke bisu.

 

Mut kôba a bé a gwé bilem bilam, gwo bini le : gwéha, hala wee u nlama gwés mut woñ libôg kikii wemede. Likap, hala wee ingéda u njôp i ndap Hilôlômbi, u nlama kébél nye ni mut liyep. Ngi-njôñ, u ntééda le, njôñ i nlôl i bug ini le njôñ liôô. Njôñ liôô yon i nkok bijek u nje ikété libaa joñ. Ingéda mut a nke mut numpe njôñ, a ntoñ i kok nye ndi a hôya le mut nu, Hilôlômbi nyen a bi heg nye. Ibale bo ndi u nke mut numpe njôñ, wa labé gwélél matiñ mana le : u nol bañ, u ke bañ ndéng, u nip bañ, u tam bañ yom yokiyo maaisoñ a gwé, u telbene bañ maaisoñ mbôgi bitembee. Yi-lihaa, hala wee u bégés isoñ bo nyuñ. Mapôôda, hala wee i lem ini i yé nseñ téntén ingéda i mut u nyi a yé ikété ndutu. Jon u nok le :mapôôda ma nyambal gwéha. Bilem bi botata ba bé ba gwé, gwon bi yé bilem bi Hilôlômbi Kimaltjai. Jon niñ mut a niñ yon i nti nye mahoñol méé.

 

 

                                                                                                                                              Yaônde, 24 Kondoñ 2006

                                                                                              Nkam Pondi Pondi

                                                                                              http://antoinepondipondi.blogspot.com