ÑAÑ MBE NLÔÔWAG, ÑAÑ NLAM KUUGEGE

Di nla kobol i ngén ini ni kal le béba ñañ i nla tjé limut, béba ñañ i nla lona manola. Mut nyekinye a ngwés bé emble wo inyuule u tabé ñañ u maséé.

Ñañ nlam u nlona nsañ, u nlona manôgla ikété mboda bôt.

Yaônde, 16 dipos 2012

 Nkam Pondi Pondi

http://antoinepondipondi.blogspot.com

LIPOP

Bôt ba nuñul bijek i tison ba gwé bisabe bi ñôt bôt le basomb bijek bi gwé ngap i lel bijek bi yé yômi ni i njel ini le, bijek bi yé nkañak bi nhee longe ndamba i lel bijek bi yé yômi bi, bi gwé disona, kei i ke bisu. Bijek bi gwon bi mbot bés môô ikété nyuu, i môô ma mon ma nlona lipop. Bôt ba kôba ba bé sal minson, ba keneg liké li isi, i gwom bi gwon bi nyimbil mahoñ ndi hanano mut len a noñ habé mu i njel i.

Base i sômba hikii yom ni mahol ma libañ bisélél ma mboñ le bôt ba nyingis habé manyuu map. Bôt ba mbet habé makala ni makôô map, ba ntéé matôa bebee ni nwemel, ba ntelep habé inyuu i kuye nkuu bitidii, ba gwéé biyiplene ni dikéñ bi nke ni linyuma i ke bisu. Niñ i tison i ntinde bôt le ba gwélél matôa i lel balal ba ndamba.Bôt ba mbénge nkuu bitidii i nya  i nloo ngandag nlélém ni keilibog, mintug mi yé i keilibog i ke bisu. I môô mana mon ma nlona makon.

Lipop li mboñ mut le a nyôs bé nyuu i nson, li mboñ mut le bôt bape ba mbag nye, li nla ti mut makon ma mahoñol, kon i bombo, makon ma ñem ni ma minkañ, let i nkañ i matjel, kon i lilô minkañ mi matjél, kon i lilô bisaha i ke bisu.

Bôt ba matibla ba nkal le mut a nlel yét i kôli nye ingéda u nyoñ yét yé i kilô, u kap ni ntel wé ngélé ibaa i méda, u nkôhna nomba i nlel tole i yé 25. Mut a yé pop ingéda i nomba i, i nlel 30.

            Yaônde, 07 dipos 2012
            NkamPondiPondi
            http://antoinepondipondi.blogspot.com

Vidéos Septembre2012

http://www.youtube.com/watch?v=jfKV5_MaGD8&list=PL5B107796814F0300&feature=plpp_play_all

MALIGA MA NKÔP BÉ MAKAK

Di nla kobol i ngén ini ni kal le hala wee maliga ma mbol bé kegikel. Hala wee maliga ma ñômbi bé. Hala wee maliga ma ta ma nyila bé yanga le mut a lep mo. Le mut a kal le maliga ma nhôla habé  i ke bisu.

Makag wee yom i nsômbôl timba. I gwom bi ngwés timba  yo , yon ba nsébél le dilunga. Dilunga tini tjon ingéda di nje kék di nkôp minluñ.

I ngén ini i ñunda bés le maliga ma nla bé yila minluñ . Hala wee maliga ma tabé yom ba nsas.

	Yaônde, 12 hikañ 2012 Nkam Pondi Pondi http://antoinepondipondi.blogspot.com

 

YéL I NSINGA

Di nsômbôl  kobol i bug i pulasi ini le puce électronique le yél i nsinga ni kal le hala a yé himamana mbañak yom i ba mbôñôl i keilibog(ordinateur) tole i nsinga i woo ( téléphone portable) i ke bisu.

Nson wéé i yé le a bog ni om minson nwomisôna ikété kei yosôna ba nha nye (minsongi, libog, likobol, liti bioda i ke bisu)

A yé boña nu a nsal mu ikété bikei bi.

Yaônde, 28 njéba 2012 Nkam Pondi Pondi http://antoinepondipondi.blogspot.com

Ba mbéna bañ yél i nsinga ni silicium.

NLEÑ

                   Di nla kobol i bug ini ni kal le hala a yé like yak liwanda, hala a yé nhyômôk i ke bisu. Mut a nke nleñ. Jon u nog le: nleñ sop bo lép. Hala wee sop yon i bak i kenek i koba lép, ndi lép u kenek bé yak sop.

Nseñ nleñ i yé kii?

Iloa bagwal ba bé kena bon bap nleñ inyuu i boñ le ba yi mambai mape, malép mape, dikôa dipe, maaa mape, mapôô mape, mambén ma biloñ bipe, mayi ma mbog mape, mangand ma mbog mape, minko mipe, yad ipe, mintuk mipe, makenge mape, minson mipe, ngwambe, bôt bape, bôdaa bape i ke bisu. Hanyen mabii ma bilog ni bingond bi bé tagbene.

                   Ba nkal le nleñ i nhôla boonge ba wanda i kônde bana yi. I yi bomede, i yi mbog yap ni mahôla ma nleñ ingéda boonge bana ba ntémb i boni i mbus nleñ wap.

                   Mut a mbéna ke nleñ ingéda ba mbégés nye ngim homa.Jon u nog le: i homa ba añal we libadô kôkôa, u pulne nyoo nleñ.

	Yaônde, 28 njéba 2012 Nkam Pondi Pondi http://antoinepondipondi.blogspot.com

 

Vidéos Août 2012

http://www.youtube.com/watch?v=nCxxwvJVRN0&list=PLE8F83DBB77410A5D&feature=view_allVidéos août 2012Vidéos août 2012