B'A LIBII LI YÉMANE ?

B'A LIBII LI YÉ MANE ?

 

Bôt ba kôba ba bi bot liada ni Hilôlômbi ni i njel ini le man munlôm a nkweeba. I mbus i jam lini, ba niiga nye sôkbôk. Hala wee mambén ma Hilôlômbi ni njee a yé Hilôlômbi inyuu man mee. Man munlôm a nyi le a nlama hémle Hilôlômbi, a nlama yi lihaa jé, a nlama bana bôdôl  ni Hilôlômbi i ke ni bisu.

 

Ingéda munlôm a mbii mudaa, i bôt bana bo ibaa, ba nlama bii ndap yap libii i moo ma Hilôlômbi. Hala wee ba nlama bana bôdôl ni Hilôlômbi. Jon ba nlama soohe nye, ba nlama yéñ mapubi ma Hilôlômbi, ba nlama kapna maséé map ni mandutu  map, ba nlama bana bôdôl ipôla yap bibôdlene bi libii jap, ba nlama kwel i ke ni bisu. Mudaa a nlama yi leege nlôm, a nlama pôdôs nye ni bilonge bi bibug i ke ni bisu. Munlôm a nlama ti nwa makébél i ke ni bisu.

 

Ingéda mam ma ndap libii ma mpam i mbégdé, babiina ba yi le libii jap li nla ôbi inyuu ngandag manjom. Njom bisu i yé le ba nyi bé mahoñol ma mut ba ntjeelene. I mut nu a nla yéñ i ôbôs libii lini ni bibéba bi maéba, ni bipôdôl  bi be, ni ha môô i hié i ke ni bisu. Jon babiina ba nlama yéñ le ba nôgla bibug, ba bana suhul nyu, ba yi nwéhlana, ba yi dihôha tjap, ba bana mahoñol ma nwee inyuu i yi kii i nkéñ le mane ma ta habé i ndap yap libii kikii i kel ba bi at bo libii jap i ke ni bisu. Mudaa a nlama yi le ibale mbôgna a nkwo, wee nyôl i nkwo.

 

Ingéda babiina ba nyéñ gwéha i Hilôlômbi, ba yi le Hilôlômbi a kéñ le libii jap li ôbi bañ. Njombongo a boñ le babiina ba bana bôdôl ipôla yap. Bayemlikok a boñ le libii jap li kwo bañ. Batuupék a ti bo yi ni pék le ba nog mane libii jap. Inyuule munlôm ni mudaa ba yé ba biina wee ba nyila mut wada. Mane ma libii ma ntinde babiina i bana ngandag mboda.

 

                           Yaônde, 30 hilônde 2009

                         Nkam Pondi Pondi

http://antoinepondipondi.blogspot.com