lundi 10 janvier 2011

Gwét bi moni

GWÉT BI MONI

I loñ i yé kunde i mbañ moni wéé. I moni nunu a nhôla loñ le i nuñul bisélél gwé biloñ bipe. Ingéda moni loñ a nsôs ngui hala wee loñ i nuñul bisélél gwé i babé ngim njom inyule bisélél bi bi nhee longe ndamba. Jon u nog le, mut ngandag nwom a nlal bé jal. Hala wee mut tjom a nyep bé ni gwom gwé. Inyule ingéda loñ i nuñul bisélél gwé biloñ bipe, biloñ bi bi nsomb bisélél bi ni moni wap. Loñ i ntééda bakén ba moni nunu. Inyule i kel loñ i pe tole biloñ bipe bi nkit le moni wap a sôs ngui, i loñ i ntééda moni wap i gwé bé ndutu inyule i nsomb i nkus wap ni moni wap. Jon u nog le,we ni matai i nyo, u nwo bé njiñ nsul. Hala wee ibale bo ndi u gwé tjom, yom i nla bé téénga we. U nogog ki le, u gwé bitôñ, wee u gwé môô. Hala wee u gwé bigwel moo, wee u yé nhat mut. Ingéda loñ i mbañ moni wé ndi i ñôô bisélél gwé i tabé bum batjo bo yol. Hala wee i tabé loñ i yé le to njee a nla boñ to kii téntén nkén loñ tole bakén ba loñ. Biloñ bipe bi ngwés loñ i mbañ woni wéé ni bisélél gwé. Jon u nog le, i maange a bééga hikamba hi nyik nyen ngwo i noñ. Mut tjom nyen bôt ba ngwés : ndi loñ i yoñ tat le i ngandag moni nunu to bigwel a yihla bañ nye jôñ. Jon u nog le, Hônd Tulak a hiôô lihat, a bôm lingo li kul. Inyu hala nyen loñ i nlama yi le libañ moni ni liôô bisélél bi yé kikii pa i nke bé le sogoo i yékle.

Yaônde,05 libui li ñyéé 2010

Nkam Pondi Pondi

http://antoinepondipondi.blogspot.com

Mangén ma lon

MANGÉN MA LOÑ

1) Hikii loñ ni héé hibél hi kôp.

NGOBOL : Hikii loñ ni gwéé bilem tole hikii loñ ni i jéé litéyag li mam.

2) Mut a nje njék ndi mut a nje bé loñ.

NGOBOL : Mut a nyan bé loñ.

3) U keneg homa, u koba ba mpes yom, u tihba bañ yo ni moo.

NGOBOL : Ingéda u nkoba bôt ba ñoo ngim mut i mbai yada, we u lo bañ i sambla nye, we ngi toñol i jam li.

4) Kii i boñ we i loñ bôt ndi u huu i loñ yoñ ?

NGOBOL : Imbee mandegle u ngwés le ba ndegle we ndi wa huu i mbai yoñ ?

5) Woo wada i nkañ bé jomb.

6) Njok yada i nkwés bé lien.

7) Woo wada u nkék bé lép.

NGOBOL : Mut a nla bé boñ jam li loñ to li mbai yéé nyetama.

8) Iyam a keneg i ndôg Tunda a yég mayel, nye li loñ li nwél ndigi me.

NGOBOL : Hala a yé le ibale u nke biloñ bipe ndi u kadba i boñ jam wetama, li li badag ngim loñ.

9) Nkana a nhéya béé Nkana numpe tamba i ño.

NGOBOL : Nseñ loñ i ñane béé le ni nlama nôgla.

10) Nwai u bi sie maloñ.

NGOBOL : Yom i nyégle habé i loñ.

Yaônde, 05 libui li ñyéé 2010

Nkam Pondi Pondi

http://antoinepondipondi.blogspot.com

Magen ma gwét

MANGÉN MA GWÉT

1) I loñ ititigi i jôlag gwét didon.

NGOBOL : Ingéda mut a gwé bé ngui i jo gwét, a nlama jôl gwét ni makenge.

2) Dilo dibe di biba JAMAN gwét.

NGOBOL : Mbombe i nla boñ we le ba bép we i gwét.

3) Gwégwét man lôg Basangén a ba ke i jo gwét biloñ, a yi bé gwo ndi a yik makanda.

NGOBOL : Hala a yé mut bôt ba nkal mam.

4) Gwét bi leñ Libôye Tôñ, bo a Nuk Manjek, bômle.

5) Gwét bi kit nsangaa, bi huune hitonga mbas.

NGOBOL : U nlama yéñ le biloñ bi njo gwét, gwét gwap bi juba bañ i loñ yoñ.

6) Gwét bi bôlôm ni bôda ba mal bé.

NGOBOL : Hala a yé le mpééna a yé le njee a yé bisu.

7) U sôô maog, u nleñ bé ngog.

NGOBOL : Ibale u ntééda bôt boñ homa, u nleñ habé gwét nyoo.

Yaônde, 05libui li ñyéé 2010

Nkam Pondi Pondi

http://antoinepondipondi.blogspot.com

Mangen ma maliga

MANGÉN MA MALIGA

1) Maliga ma njôp i ndek.

NGOBOL : Hala wee maliga ma nene. Di ngwel mo, ma nla habé so, ma nla habé nimil.

2) Maliga ma nkwo i tjai.

NGOBOL : Hala wee pééna i ta habé. Hikii mut a ntee i homa maliga ma yéne.

3) Mataa a mbambap.

NGOBOL : Hala wee maliga ma nene.

4) Me mpot mee.

NGOBOL : Hala wee me mpot maliga.

5) A nliga toi.

NGOBOL : Ni maliga a mal yoñ makidig.

6) A nlo toi.

NGOBOL : Ni maliga a nlo.

7) A nwo toi.

NGOBOL : Ni maliga a mal nwo.

8) Mbôñ i kubnege miñañ.

NGOBOL : Nkwel i nyelel maliga.

9) Wada a kol mbada, ibaa ba kol nhôôlag.

NGOBOL : Ingéda we ni mut ni ñañal, hanyen maliga ma yéne.

10)Ngandag ntoña i nlona nyemb.

NGOBOL : Ingéda u nléba maliga ma bag ma sôli, u nla kôp matjél tole u nla nidba.

11)Maliga ma nkomb bé mbus ño.

NGOBOL : Hala wee maliga ma nyi bé bitek.

12)Nog ni maôô a nkona bé ngôñ, hale u tehe ni mis moñ.

NGOBOL : Hala wee mut a ngwés tehe maliga ni mis mé.

13)Maliga ma nkôp bé makak.

NGOBOL : Hala wee maliga ma nkééña bé.

14)Maliga ma nkuibaha jis, ndi ma ntôp bé jo.

NGOBOL : Hala wee maliga ma nkoogana ñem ndi ma yé longe.

15)Kikii mbambat i mbam, ndi tju di ño bé hala.

NGOBOL : Hala a yé le u nog mbimba i ngim jam ndi hala bé nyen yag maliga ma yé.

16)Kikii me mbép ngwo, wee me nsônga nsômbi ?

NGOBOL : Hala wee yom me mpot maliga, me nsônga bé me jam jokijo.

Yaônde, 17 libui li ñyéé 2010

Nkam Pondi Pondi

http://antoinepondipondi.blogspot.com