WANDA

WANDA

Di nla kobol i buk ini ni kal le hala a yé pes niñ i pôla libak li maange ni li néñha mut.

 

Di nla ki kobol i buk ini ni kal le hala a yé ntôñ bôt ba yé ngi un. Jon u nok le, wanda i ngim loñ, wanda i ngim litén, wanda i ngim ntôñ, wanda i ngim nlôñ i ke bisu. Ba mbéna yil wanda ni ngim mintuk, minson kikii bo litjap tjéé, libegee lisege,  nkuu u mim, lisak ngim malok, lije ño nyik i ke bisu.

 

Ba nyil wanda le mahoñol map ma nhôôlak bé. Jon u nok le: wanda ngwo, hebéle  i nje, i ntuk bé. Hala wee mut nu a mbôñôl ndigi jam i ngôñ yé. Inyuu hala nyen loñ i yé i yoñ ngim mambén i kéñ le mam mabe ma yumus bañ wanda.

 

Ba nyil ki wanda le i nla lona mahééña i ngim mam i yé nkobda i  ngim loñ noñnaga ni litehge jap, ligweleg jap li mam i ke bisu. Jon u nok le yômi hyone hi wanda. Hala wee maange wanda nu ngui. Ba nyil ngim wanda le i njôp  bilôñ bi be ndi ba nsôk yil ngim wanda le mbôn i wok dison di yihga.

 

Yom u nlama tééda, yo ini le, i loñ i gwé bé wanda, i nyin.

 

Yaônde, 16 biôôm 2014

 

NKAM PONDI PONDI

http://antoinepondipondi.blogspot.com

BAYEMLIKOK

BAYEMLIKOK

 

         Bôt ba kôba ba bé sébél ki Hilôlômbi le Bayemlikok. Hala wee yom yokiyo i tabé i ngii yé, hala wee yom i nloo bé Hilôlômbi. Hala wee yom yokiyo i nla bé yémbél Hilôlômbi. Jon u nog le, pôndôl i yôñlag i janda.

Hilôlômbi nyen a ñane ngii ni hisi jon nyetama nyen a nla tat we ni sôñ we. Hilôlômbi a nyi mam momasôna. Jon u kal bañ le i bet ba nol i jôi li Hilôlômbi ba nwo inyuule ba niñ ndi we u nla bé nok. Inyu hala nyen jo sañ i njel Hilôlômbi ni i bet ba njôs we. Ndi u noñok  hi kokok le u suu bañ sañ inyuule  Hilôlômbi a ngwés bé bôt ba téé bé sép. Bat Hilôlômbi nwélél inyuule a yé longe ni kona ngoo. Hilôlômbi a nti ane i mut a nlémél nye.  Hilôlômbi a mboñ i yom a ngwés. A nkônde lihat i mut a nlémél nye. A nti pék ni yi i mut a ngwés. Hilôlômbi nyen a nkena  i bôt a ngwés. Hilôlômbi a mbééga bé we mbegee i nloo we. Masoda ma yé  i moo ma Hilôlômbi, a nti mo i mut a ngwés. Hilôlômbi nyen a nti niñ ni nyemb ndi a ntehe ki maboñog moñ. Hilôlômbi a ngwés i bôt ba gwé mban ni i bôt ba mboñ longe. Jon ingéda u mbégés mambén ma Hilôlômbi ndi u konog nye woñi, u yi le Hilôlômbi a ngwés i bôt ba nkon nye woñi. Hilôlômbi a ntat i bôt   ba nhémle nye. A ngwés bé le nkoñ hisi i tjé. Yom u nlama tééda a man mee yo ini le,  u  nla ndigi yémbél mam ma niñ ingéda u ntééda libag joñ kikii yom bisu ni sômbôl Hilôlômbi nyetama kikii yom i yôhne iba.

 

 

 

 

 

 

 

 

 

TJEÑBES

TJEÑBES

 

 

 

      

Di nla kobol i buk ini ni kal le hala a yé njel i yé kidik. Hala wee ibale bo ndi u nyodi i homa u yé ndi u nke homa numpe, tjeñbes a yé le u yoñ ngim njel ya boñ we le liké joñ li ba kidik. Inyuu hala nyen tjeñbes ya hôla we le jam li tômbôl we, ni ki le li pala boña. Hala a boñ we le u nlôôs bé ngéda.

Tjeñbes  a yé lihubus ngim jam. Jam li, li nla ba matila, liké, liboñ ngim jam i ke bisu. Tjeñbes a nla ki kobla le semkes.

 

 

 

Yaônde, 18 hikañ 2014

                                                   Nkam Pondi Pondi

                    http://antoinepondipondi.blogspot.com                                                                     

 

                                                                   

 

PULAPULA

PULAPULA

 

 

      

Di nla kobol i buk ini ni kal le hala wee mam ma ta bé mbobog, wee mam ma nke bé longe, wee yubda i yé, wee mam ma yé ntuñlaga. Hala wee mpungu i yé mbog yosôna. Hala wee hikii mut a mboñ i jam a ngwés, i yom i ntagbe nye i boña wé i ke bisu. Jon u nok  le: bum batjo ba yol.  Hala wee mut  a nôgôl habé makidig. Hala wee di njôp i njañtibra. Jon u yé u keneg u   ada kanga  maka. Hala wee homa a yé nlibda  nlibda. Hala wee njel i ta habé. Hanyen jiibe  li yé li jôp. Njel i mbuuda. Yak bot ñem i yé i mal. Inyuu i boñ le u nôôga, lôs yon i mbéda. Jon u nok le : banguña ba lôs. Hala wee mut nu a nkon bé woñi .

 

Yaônde, 14 hikañ 2014

                                                   Nkam Pondi Pondi

                    http://antoinepondipondi.blogspot.com                                                                     

 

                                                                   

LIGWÉ LI MBAGLA MATÉN

LIGWÉ LI MBAGLA MATÉN

 

      

Matén momasôna ma nlama bégés mambén ma loñ ma yiine tole i het ba bi botbana.

Hémle i ta  bé jam li mut nyetama ndi  jam li ngandag bôt. Jon hémle i nkiha ni mbog. Jon u nok le : bañan bon ba Jop.

Ngim matén i nhoñol le yi yon i yé mut, mut nyen a gwé yi yosôna ndi ki inyuu man mee, Hilôlômbi nyen a yé mapubi ma nti mut yi ni pék. Bôt ba kôba ba bé bénge sôñ le i unda bo kalénda i bégés Hilôlômbi inyuule sôñ i mbay ni mapubi hañngaa hi nti nye.

Liôô bisélél, libañ bee, lisal bijek, liboñ nyunga bi nkiha ni mbog bihégél, hala wee mambén ma Hilôlômbi.

Ngi manôgla ini i pôla ngim matén yon i ngwal  mbagla matén. Mayi ma mbog mon ma nhôla litén le li yin bañ. Yak lisemel jôi joñ li mpamna we litén joñ. Jon u nok le : mbog i yé makwo ma ñyéé, mbog i kwok, mbog i nyodag. Ibale bo u nyi habé mbog yoñ, u gwé bé minkañ, wee u nimil, u ñadal to hee, wee béba e.  Hanyen mbagla matén i nlôl. Wa boñ laki ndi u kumb ki soñ.  

                             

 

 

 

Yaônde, 14 hikañ 2014

                                                   Nkam Pondi Pondi

                    http://antoinepondipondi.blogspot.com

                                                                     

 

BÔDÔL ÑEM

BÔDÔL ÑEM

 

Di nla kobol i buk ini le bôdôl ni kal le hala a yé libembek li bot ñem. Jon u nok le, me gwé bôdôl ni Nwet wem. Hala wee me gwé mapide.

 

Di nla kobol i buk ini le ñem ni kal le hala a yé ngim jô nyuu ikété to inyuu kap matjél.

 

Di nla kobol i buk ini le bôdôl ñem ni kal le hala a yé hémle le yom u nsômbôl  i gabôña le jam u yé ngi bana u gabana jo, u gakôs jo.

 

Di nla ki kobol i buk ini le bôdôl ñem ni kal le hala a yé i yi mu ikété yoñ le jam u yé ngi bana u gabana jo, u gakôs jo le yom u nsômbôl i gabôña.

 

Jon mut a nla bana bôdôl ñem ni mut numpe, ni ngim yom, ni nyemede, ni Hilôlômbi i ke bisu. Maange a mbôdôl isañ ñem le to libee jam li mpémél nye, isañ a yé ha yak bahémle Hilôlômbi ba nhémle le Hilôlômbi a nla boñ mam momasôna. Jon ba mbôdôl nye ñem.

 

Bôdôl ñem i mboñ mut le a nyémbél mam ma niñ inyuule a nyi le niñ i gwé maséé ni mandutu.

 

 

Yaônde, 20 biôôm 2014

NKAM PONDI PONDI

http://antoinepondipondi.blogspot.com  

.

Ligwé li likenge

LIGWÉ LI LIKENGE

 

Likenge li yé liôt tidii, libañ ôngba, njunju, lioñ bunga, sel, ndap i ke bisu. Mut a nla bé ôt tidii i ñunda  Hilôlômbi. Mut a nla bé bañ ôngba to njunju i ñunda Hilôlômbi. Hala a yé kila i base i sôkbôk.

Tidii, ôngba, njunju, sel, bunga, ndap i ke bisu nseñ wap i yé le i yom ba ñôt, tole i yom ba bañ tole i yom ba ñoñ bi ba lam. Bôt ba ngwés lama i ôngba, i tidii, i njunju, i sel, i bunga, i ndap i ke bisu. Lama i mpamna we i gwéha.

Hilôlômbi a yé gwéha jon a bi ti bôt ba kôba yi ni pék i ôt tidii, i bañ ôngba njunju, i oñ bunga, sel, ndap i ke bisu. Jon u nok le: li lama hee! U bat nwet.

Masoda ni nu a nkil hi kokok.

 

 

Kunde ni nôgôl

KUNDE NI NÔGÔL

 

            Di nla kobol i buk ini le kunde ni kal le hala a yé mut nu mut mumpe to yom i mbédgé i ñane bé. Hala wee a mpambaga isi ane i mut mumpe.

            Di nla ki kobol i buk ini le kunde ni kal le hala a yé ngui mut a gwé i boñ jam to i niñ ngim liniñig i ba béle mut numpe a sônga nye i boñ i jam li.

            Di nla kobol i buk ini le nôgôl ni kal le hala a yé nok ni boñ i jam li mbéda mut. Jon bon ba nlama nôgôl bagwal.

Mut a nlama nôgôl mbén inyuu i boñ le a ba kunde inyuule mbén i yé i ngii bôt bobasôna. Jon u nok le : mut a nje njék ndi mut a nje bé loñ. Ndi i nsômbla bé le ngim mbén i kéñ we le u ba kunde. I ntén ngéda, i, u kôli i tjél nôgôl mbén, i tjél boñ ngim jam inyuu i boñ le u tééda libak joñ li kunde. I mut a yé minkôm a nyéñ i ba kunde.

 

 

 

 

NDUÑA

 

Di nla kobol i buk ini ni kal le hala a yé ngéda mut a nyoñ inyuu mut numpe. Jon u nok le ni nlama bana nduña inyuu bon banan. Nduña bisu i nla ba. Yon i yé jam u nlama bôk boñ, li u nlama bôk tôñ ni jo. Jon mut a gwé nduña, mahoñol ma ta bé nye ñwee inyuu i jam a nlama boñ, inyuu i jam a  mbemb, inyuu i jam a nyi bé maông i ke bisu. Hala a nlôl le mut a nyi bé kikii kel i ñye, mut a nyi bé bisu bi mbog i ke bisu.

Yom u nlama tééda, yo ini le, mut a gwé nduña, a nyéñ le  a ba longe nye ni bôt bé.

 

                                                        Yaônde, 01 hikañ 2014

                                                        Nkam Pondi Pondi

                        http://antoinepondipondi.blogspot.com                                            

 

 

 

B’A DI NLAMA BOÑ MAM MOMASÔNA INYUU I BANA NIÑ LAM?B’A DI NLAMA BOÑ MAM MOMASÔNA INYUU I BANA NIÑ LAM?

B’A DI  NLAMA BOÑ MAM MOMASÔNA  INYUU I BANA NIÑ LAM?

 

 

Liyén niñ lam li yé longe njômbi ndi mbadga  i yé le b’a hala a nti me kunde le me mbôk mbén, le me nip, me sol mut numpe, me le kee wañan nwa ndéng  i  ke bisu inyuu i bana niñ lam. Jon di nyi le i mut a nkand kuu a nla bé bana niñ lam to i mut a mboñ béba a nla bé niñ lam. Ndi i mut a mboñ longe, longe yé i mboñ nye le a bana niñ lam.

 

Mut a nla nôñôl i njel mbog yé inyuu i saa moni a nkôle le a témb bañ mut  mbôgi  bitembee,  mut litut li mbus kiñ i ke bisu. Jon i njel me ntep i nla boñ me le me tjél bana niñ lam.

 

Niñ lam i nla ki ba ni mut wem libôk. Inyuu hala nyen ingéda ngandag ikété yés i niñ niñ lam, hala a nkobla le yak me, me yé mu i nsongi i, i bôdôl   i ndap  yem bôt, i ke litén jem, i noñ i loñ yem ni biloñ bi nkoñ hisi. Ndi b’a niñ lam i nla kiha ni mut nyensôna, noñnaga ni mayi ma mbog ma hikii mut? Liyéñ le maloñ ma bana niñ lam hala a nkena i tjiba. Inyuule ngim biloñ i ñane biloñ bipe ni mahoñol mana le bakén ba biloñ bi nlama bana niñ lam kikii ngim biloñ i.  Mu  i njel i nyen u ntehe biloñ bi Bakana ba Mbenge ba bi lona yubda   biloñ gwés. Jon mam momasôna bé mon ma nla boñ le mut a bana niñ lam. Mam mape ma yé i niñ mut kikii bo liba ngwélés, li bana suhul nyuu, li bana ngôô, i yi nihbe i ke bisu ma nlel liyéñ  i bana niñ lam.

 

I njel mut a ntep i nla boñ nye le li bana niñ lam li ba bé yom i yé bun noñnaga ni niñ a ngwés niñ. Inyuule mut a nlama yi le niñ i yé yak ndutu mut a mboma , njôhge mut a nkôs, binoode bi mam bi mpémél nye i ke bisu.

 

            Yom di nlama tééda,  yo ini le, di nlama bé boñ mam momasôna le di bana niñ  lam ndi di nlama boñ libim le di bana niñ lam.

 

 Yaônde, 16 njé ba 2014.

Nkam PONDI  PONDI

http:// antoinepondipondi.blogspot.com

B’A DI NIÑ INYUU I BANA NIÑ LAM?

B’A DI NIÑ INYUU I BANA NIÑ LAM?

 

       Di nla kobol i buk  ini le niñ ni kal le hala a yé mahoñol  momasôna ni maboñok  momasôna ma mut ma, ma mboñ nye le a nôgda  nseñ wé i yé le a nimis bé ngéda  yé , a ntehe  mahee ni mam a ngwel i ke bisu.

 

I ño buk ini i yé mahoñol mut a ñôt noñnaga ni libana niñ lam. I niñ  di niñ i mboñ bés le di bana niñ lam. Niñ  yés i mbénge yak nyuu yés, mbebi di nhép, bijek di nje, malép di nyo i ke bisu. Hala a nkena bés mane ma niñ, hala wee i tjél ndutu, njôhge i ke bisu.  Ingéda u mpam hana i homa nunu, u ntehe le hala a yé ngim yom mut a nla bana tole ngim yom mut a nla yéñ inyuu yé tole inyuu ngandag bôt.

 

Libana niñ lam li yé ngim jam u nyéñ le u nla  bé bak, niñ le u ntéénga bé mut libôk, u nyi le mut a njôp bé i  yañan bum.

 

Yaônde, 16 njé ba 2014.

Nkam PONDI  PONDI

http:// antoinepondipondi.blogspot.com