B’A MUT A
NLA KWEL NI MUT NUMPE ?
Yom
di ntehe, yo ini le, to hala kikii manwin ma ntjama ni mbog yosô, bôt ba nkwel bé ngandag. Nkwel u yé kii ? Mut a mpot numpe a ñemble, yak nyek a ntimbhe, mut
a emble nye.
Yi i yé gwom bi tagbe
mahoñol ma mut. Da tehe kii i nkéñ nkwel ikété bôt ni lelaa nkwel u nla ba
ikété bôt.
Ibale bo ndi u nyoñ hihéga i loñ yés, wa ga
tehe le, ngim bon ba loñ ba nyan libag li basôgôlsôgôl ni i njel ini le, ba
mpot ni boñ mam map kikii Bakana ba Mbenge ba, ba bi énél loñ yés. Inyuu yap,
bilonge bimam gwobisôna bi nlôl ndigi Bakana. Nhindô mut u nla bé yi boñ jam
jokijo i mis map. I mut numpe nunu, a yé mut kikii we, ndi ni yé bôt ibaa, we
ni nye ni nkwel bé, biyi binan bi meyna bé to ibale bo ni mpot hop wada. Nye a
gwés ba isi ane i loñ pe, ndi we u ngwés ba kunde. Jam lipe li yé ki mu le, i
nwet a mboñ sukulu, yaani a kôhna mambôngi, nson wéé i ti nye bigwel moo. Ni
ha, i ti loñ, a nene kikii nwet woñ, we u bag kikii nlimil wéé.
Hala a ñunda bés le yom i nkéñ nkwel hana
i yé ngôñ lipémba. Nkwel u nla ba ikété bôt ingéda linogol bibug li yé, ingéda
ba nyi le ligwé jap li mbog li yé bo nseñ inyuu libag jap li bôt ba binam. Mut a nla kwel
ni mut numpe ingéda bôt ba nyi le, ba kôli mambén. Ingéda mut a nyi le a kôli i
boñ i mam ma nkon nye ngông ibabé nye i bôk mbén, hanyen a nla kwel ni mut
numpe.
Yom
u tééda, yo ini le nkwel wés i tihba ndigi ligwé li mbog. Nkwel u tihba mam mape i ke ni bisu.
B’A MUT
TISON A NLA KWEL NI MUT MBAI ?
Yom
di nyi, yo ini le, mut tison a nhoñol le, nyen a nla niiga mut mbai kii i yé
mahol. Ndi, ibale bo, di mbénge ibôdôl hanano 37 ma nwi, di ntehe le, manjel
momasôna mut tison a nnoñ inyuu mahol, mahol ma nene béé inyuule mahol ma mbat
ngôôba ni neebe i mut tison ni mut mbai le, ba sôñ ligwé li mbog, le ba jôs
liyep ni i bot lihat inyuule i yom koñ i lôla i ñunda bés, yon i yé le, di nyi
habé mbog basôgôlsôgôl ba bi yigle bés, ndi to mbog Bakana ba mbenge.
B’A NGWAL A
NLA KWEL NI MAN WÉÉ ?
Man
ingéda a ngwéé, mut bisu a nla kwel ni nye a yé nyañ ngwal nye. I nyañ nu, a yé
nye mam méé momasôna, malam ni mabe.
Nkéñéé man u mbôdôl yi su i nyañ, a ntehe
nye, a nup mis inyuu i bénge nyañ. A mbôdôl yi liké li nyañ, moo ma nyañ, njiñ
nyañ ni libéé li nyañ. Nkéñéé man u ñee ndigi bé libéé li nyañ, sômbôl yéé i yé
le nyañ a gwés nye, a kwel ki ni nye. Nkwel unu, i pôla nyañ bo man a ntip
gwal, won u nla ti i man nunu bilem ni libag jéé, ingéda a yila mut. Maange a
yé a nañ, le a nyila maange wanda, ngim gwom pe, i mbôdôl kon nye ngôñ. A nyéñ
i ba kunde, a ngwés le, ingéda a yé i ti, bôt ba yi le ngim mut i, i mpot kikii
hihéga. A nyéñ i yi ngim mam i, i ntagbe i niñ i mut binam. Hanyen u nog boonge
bape, ba mbat bagwal bap le, lelaa man a ngwéé ? U mbéna ki tehe le,
maange wanda a ngwés a yén i yéé pes nyetama inyuu i ôt mahoñol. I pes i maange
munlôm, u yi ni le, mudaa a mbôdôl kon nye ngôñ inyuule manum ma nla bôdôl pam
nye.
YAÔNDE,
02 kondoñ 1998
Nkam
Pondi Pondi
http://antoinepondipondi.blogspot.com
