BÔS MUT

BÔS MUT

 Di nla kobol i buk  ini ni kal le, ingéda mut a  mboñ jam ndi a ntibil bé ôt mahoñol, nyen ba nkal le i mut nut nu a yé bôs.

Ingéda mut a ntihmbe mbadga tole ingéda mut a nyoñ hop kikii nyuu yéé i ntiide nye le a ntibil bé ôt mahoñol, nyen ba nkal le i mut nu a yé bôs.

Bôs mut i mbéna bé boñ longe jam. Jon u nog le : kisagda i kôba, a kek matjee ngi-hôlôl. Inyuu hala nyen nyiinga i moo moñ ni nyiinga i makôô moñ bi nlama lôl i boña woñ tigale u ba bôs mut.

Mut a nteg bé tam i jam a mboñ. Jon u nog le: bale me yila, a ta a hañak bé i jam.

I mut a nyét a tabé bôs mut, a yé mut a gwé soñnda. Mut a nyi gwel nyemede.

Yaônde, 26 matumb 2006

Nkam Pondi Pondi

http//antoinepondipondi.blogspot.com

NJINJIGA

NJINJIGA

         Di nla kobol i buk ini ni kal le ingénda hisañ hi yé nyonok ni mbebi ndi mbebi i i mpam bé longe, i nkobda i ngodol, hanyen a mboñ we njinjiga.

Ingéda man a mbep nyuñ milik, milik mi nhékbe nye njel nhébék. Njinjiga i ngwel nye. Hala wee milik tole bijek bi ntagbe habé longe. Ingéda ba nyus nye malép, ma mbaa njel mbebi. Njinjiga i mal.

 Njinjiga i yé nkidna nhébék u ségbege. Njinjiga i nkidi ni malép i ta bé ngim kon. I njinjiga ini i nnom bé. Ini i nkidi bé ni malép  i yé ngim kon . Ha u nlama tehe mut matibla.

Yaônde, 18 njéba 2018

                                                                 Nkam PondiPondi

http://antoinepondipondi.blogspot.com

NYEMB

NYEMB

1)       liket nyemb	= Mut a nwo bé mañ
2)      Nyemb i nyemb	=  Nyemb  i nhélés bé mut.
3)      Nyemb pa	= Nyemb matjél.
4)      Puhe nyemb	= Nyemb  i bôt ba  bembek bé.
5)      Papama nyemb	= Nyemb i i ntôl bé.
6)      Tam nyemb	= Ntamak nyemb  = ba ntam we nyemb.
7)      Toñ nyemb	= Ntoñok nyemb = mut nyemede a nyi nyemb yé.
8)       Yéñ nyemb	= Nyénék nyemb = mut nyemede a nyi nyemb yé.

                                  Yaônde, 18 njéba 2018

                                  Nkam PondiPondi

                                                    http://antoinepondipondi.blogspot.com

BOMBA MUT

BOMBA MUT

         Di nla kobol i buk ini ni kal  le hala a yé mut nu a gwé bé ngui.

Yaônde, 7 biôôm2017

Nkam Pondi Pondi

http://antoinepondipondi.blogspot.com

LINYAÑ

LINYAÑ

1)   Linyañ li babot

2)   Linyañ li bagwal

3)   Linyañ li baisañ

4)   Linyañ li bon

5)   Linyañ li bon ni bon

6)   Linyañ li bôt

7)   Linyañ li libôk

8)   Linyañ li linyañ

9)   Linyañ li ndap bôt

10)       Linyañ li njal

Yaônde, 10 njéba 2018

Nkam Pondi Pondi

http://antoinepondipondi.blogspot.com

LIKWO NYUU

LIKWO NYUU

Di nla kobol i buk ini ni kal le hala a yé sôkbôk mane mut a nok ingéda malal. Nyuu yé yosôna i nok mane, i nyiñgha, nhébék wé i mboñ wee i nkidi, ñem i kwok nye. I jam li li  nnom bé inyuu ngim bôt. Ngim bôt i pe i nla kwo nyuu ngandag ngélé ingéda malal.

 Likwo nyuu li yé jam li malal le manum ma munlôm ma nke litjee li gwal li mudaa. Ingéda mut a nkwo nyuu a nla habé gwel nyuu yé. Ngim bôdaa ingéda ba nkwo nyuu masai ma so nye, a tigik, yak bape ba nlond i mam ma ma ta bé minkôôbaga i ke bisu.

         Ibale likwo nyuu li ta bé,  gwal i ta bé.

                                                                                                  

   Yaônde, 03 njéba 2018

                                                                                       Nkam PONDI PONDI

                                                     http : antoinepondipondi.blogspot.com

NGWO I YI JÔI JÉÉ NI ÑEM

NGWO I YI JÔI JÉÉ NI ÑEM

                   Di nla kobol i ngén ini ni kal le hala a yé mut a nyi nyemede. Hala wee mut a nyi bilem gwé, libag jé, a nyi le i yom a mboñ i yé longe tole i yé béba, a nyi i yom i nlémél nye ni i yom i nlémél bé nye. A nyi le i bale bo ndi a ngwés bé njôha, a njôha bé ni bôt ba minjôha i ke bisu.

         I mut a nyi nyemede to ibale ba nsima bé nye jôi, a nyi nyemede le nyen ba mpôdôl. Nséñ le mut a nyi nyemede i yé le, a nla timbhe i nwet a ntop bé sima nye jôi tole a nii nye. Inyuu hala nyen mut a nlama ndugi yi nyemede. Jon u nok le: a neg, wee u nôgôl likek joñ.

         Ibale u nsômbôl ba banga mut tole ntôô mut , joo sañ le u mbôdôl yi wemede.

Yaônde, 27 hilônde 2018

Nkam Pondi Pondi

http://antoinepondipondi.blogspot.com