mercredi 30 septembre 2015

TÉMB NI MBUS


TÉMB NI MBUS

 

Di nla kobol i buk ini ni kal le hala a yé i ke homa u bi nyodne, i homa u nlôl.

Ingéda Hilôlômbi a bi hôla bôt ba kôba le ba yémbél gwét bi bi juba i Ngog Lituba ni i bôt ba bé gwés le ba jôp i base baôm mbom isi nyen Hilôlômbi a bi bôn bôt ba kôba nkoñ. Hanyen bôt ba kôba ba bi nyodi i Ngog Lituba. Ba kahal kat minkoñ. Ba pam i lom pubi. Ngim bon ba mee i kit le i nyap bé lom pubi. Ba babam lisege i hiangaa. Bon ba nsébél le Babimbi. Bana bape ba yap lom pubi, ba kat minkoñ mi di yiine len i pam i tuye. Tuye nyen a bi téé bo. I bôt ba yap lom pubi, ba témb habé Babimbi. To i bet ba yégle Babimbi ba témb habé i Ngog Lituba inyuule litémb ni mbus li héha nyaga likus i mbus. Hala wee i mam ma mal tagbe u nkôm mo mbus. U mbénge i mam ma nlo we bisu gwoñ. Jon u nok le : i keneg ni bisu nkeneg. Mbén bisu ba mal nsayap mut, ba nkal nye le a kee ni bisu, a helba bañ. I mam ma u nlama yémbél mo inyuule Hilôlômbi a bi bôn bôt ba kôba nkoñ. Hilôlômbi a nsayap i nkoñ u. Nkoñ u u gwé lihat kikii bie, mapôô, malép, mabui, gôl, bup, muli, mpuma, mamuna, lingénd, bilém, maaa i ke bisu. Inyuu hala nyen man mee to wada nu a bi ke i kat minkoñ a bi témb bé ni mbus to mboda yé a bi bot. I nwet a bi yi bé i het a kee, manyañ a bi ôt nye. A kal nye le a koñop hana mbaa. Jon u gwé jôi li mbai ini le Dikoñop. B’ a mut ni mboda i bi ke i kat minkoñ a nla témb ni mbus i bana liôñôl litén jé?

Yom di nyi ni tehe, yo ini le, mam mee a nla nyodi i mbai yé i ke i mbai litén jé li bi kat, ba nti nye liôñôl, bon u nok ba nsébél le lôg Bisuu ndi di ma tehe bé man mee a ntémb ni mbus i ada litén jé. Inyuu kii hala a mbôña bé? Kii i ntuga i jam li? Ingéda u ntémb ni mbus hala a nene wee i nkoñ Hilôlômbi a bi bôn bôt ba kôba ba bi kôhna bé wo, hala wee likak li Hilôlômbi li bi yon bé. Jon bôt ba kôba ba bé yis lôs mut i nkoñ ba nkat ndi to ba nke ni bisu. Inyuule i yom u nkôhna u nlep bé yo, u ntjôô bé yo. Jon u nok le: man munlôm mbénd hônd, i homa i bôône, ba nlep bipes. Ni le man mee a ntjôô bé hisi hé kikii matén mape. Man mee a ñoñ ndap hanyen a mbép woo i tôl.   

 

Yaônde, 05 mpuye 2015

 Nkam Pondi Pondi

                                                                       http://antoinepondipondi.blogspot.com

mardi 29 septembre 2015

NYO MBE


NYO  MBE


 

             Di   nla    kobol     i    buk     ini   ni     kal    le   hala   a     mut  a  nyelel   mam  ma  be   ni   dihôha     di   mut  numpe  ni  i  njel    ini   le   a mpot nye  béba  ni   mahoñol   mana le  a mbañ        jam   li   mut   a  mpot .  Jon    u nok   le:  tôle  a mbôlôl  mut   i    nyo .   Hala wee hikii  yom   i   mpam   nye  i   nyo   i     bôô .


 

                  Mut   nyo   mbe   hikii   buk  i mpam i   nyo     i      béba .  Mut nyo mbe a nhoñol le  a  nsuhul   mut  numpe , a  nlel  mut   numpe  ndi  a  yi      le   a   ntéd   libind jé. Jon u  nok   le : ñyéé  u  kal  mudaa  nye    nyo  woñ    won   wa  nôhla  man  woñ .Hala wee nyo mbe i nol   mut   a  mpot ,  i  nol  i   mut  ba  mpôdôl   ni   i    bôt   ba   ñemble .   Jon  nyo mbe  i  nla lona   manola  inyuule   bôt   ba  nôgla  bé . Mut  nyo  mbe  a  nkôp   lisanda . Mut  nyo mbe   a  ngwés      mahol   to  nsañ  .  Mut  nyo  mbe  a  nyi     hinoo  ntomnga . A nla     yén i  ti  bambombog   to   mbog  a nla bé  pot . A    itii  be.


 

                         Yom u  nlama yi ,  yo  ini   le,   longe   nkwel  i    nloo  je  nlam .  Hala wee  nkwel  lam  i  ntibil   mam  i  loo  bigwelmoo.

 

 

 

Yaônde ,  27   matôp  2015  

Nkam   Pondi  Pondi 

                            http://antoinepondipondiblogspot.com  

 

 

 

 

 

 

 

U KAL BAÑ LE I BET BA NOL I JÔI LI HILÔLÔMBI BA


NWO INYUULE BA NIÑ NDI WE U NLA BÉ NOK


 

I mut a nwo i jôi li Hilôlômbi u nyi bé i nyuu a bana, mambee maông a bana, to a ba mbu, u nyi bé i homa a ba a niñ to nkoñ a ba a niñil too nyus ya ba nyoo, mapubi, bijek, nson, ngoa, bie, binuga i ke bisu inyuule pék yoñ i nla bé pam kikii pék Batuupék.

 

I mut a nwo i jôi li Hilôlômbi a bana niñ boga hala wee a yi habé ndutu, a niñ i kété maséé ni gwéha i Hilôlômbi.

 

I mut a ngwés niñ niñ boga a nlama bégés mambén ma Hilôlômbi. Mbén bisu Hilôlômbi a bi ti bôt ba kôba ingéda a bi hôla bo i yémbél gwét i Ngog Lituba ni i bôt ba bé gwés le ba jôp i base baôm mbom isi yon i yé le: man mee a je bañ bijek, a nyo bañ maog ma loñ i ñane nye tigale a yila nkol i loñ i. Ingéda u nsal bijek gwoñ, u ñôô bisélél gwoñ, u mbañ bee gwoñ, u nyok maog noñ ndi u nuñlag bijek gwoñ, maog moñ , bee gwoñ ni bisélél gwoñ ni nkoñ hisi hala wee u nke bé maaisoñ njôñ u ntam bé yom i maaisoñ, u nke bé nwa maaisoñ   ndéng to nwaa  mut woñ   libôk, u nyi le kila bisu man mee i yé kila matjél i ke bisu. Ngui Hilôlômbi i nene ingéda u nsal. U je ngandag, u nye ngandag. mbén i Yôhne ibaa Hilôlômbi a bi ti  bôt ba kôba  i Ngog Lituba yon I yé le : man mee a nuñlene bañ biték gwé mut a ta bé man mee inyuule Hilôlômbi nyen a bi ti bôt ba kôba nkoñ. Mu i nkoñ u, Hilôlômbi a bi ha lihat i kété isi, lipan li yé mu i nkoñ u, malép ma yé mu i nkoñ u i ke bisu. Mbén i yôhne  iaa Hilôlômbi a bi ti bôt ba kôba  i Ngog Lituba yon i yé le : munlôm a haba bañ mbod mudaa to mudaa a haba bañ mbod munlôm inyuule Hilôlômbi nyen a nyi  inyuu kii a bi heg munlôm yak mudaa.

 

Niñ yoñ i nkoñ biték yon ya boñ we le u bana niñ boga. Nginda hibee i hi jek batôle.

 

 

Yaoundé, le 22 matôp 2015

 Nkam Pondi Pondi


 

 

SÔKBÔK NI KOŇ LÔLA


SÔKBÔK NI KOŇ LÔLA

 

Ngéda koñ lôla i mpam i ngim loñ, i ngim litén, i n                                                                                                                                                                                                                                                                                                                                                                                                                                                                                                                                                                            gim ndap bôt i ke bisu banga kunde i ta habé i kété  mut binam, i pes biyihne  bi mapep ma manwin, nkuu mahop, nkuu bitidii, ndes                                           manwin i ke bisu, bôt ba kôli habé i pes i yigil i sukulu, nson ba nsal ntôñ, gwéha i linyañ li bôt i ta habé, ngim bôt i niñil i njal, bape ba gwé bé malép ma nyo, mapubi, minloñ mi yénséñék, mandap ma matibla ma nyiñba, ngim bôt i tehe nseñ  i jôp i njel njagi, bape ba nhoñol le li somb gwom bi nla hôla bo le ba yi bé koñ lôla, ba ntuk mintuk mi moni ndi ba hôya le koñ lôla i mboñ le mam ma yé pulapula, ñlôm ñyée man a yé mag, hikok hi yé hi soo bas, hi numb liban i ke bisu. Ngôñ  mut i yé kii ? Mut angwés kii ?

 

Base i sôkbôk i nniiga bés le ligwés Hilôlômbi li nloo i kon Hilôlômbi woñi ni i njél ini le gwéha i mboñ we le u nti hikii hégél i Hilôlômbi lipém, u ntam bé yom i maaisoñ, u nke bé maaisoñ  njôñ, u nyéñ i niñ i kété nsañ, u ngwés bana ñem nlam,  u nyi le u nlama ba mut nu a yé ntiik maliga i ke bisu  jon u nlama bana nwee mahoñol  inyuu i yi wemede ni bégés mambén ma Hilôlômbi. Hala nyen wa yémbél  koñ lôla.

 

 

 

                         Yaônde, 23 matôp 2015

             NkamPondiPondi


 

INYUKII U NLAMA YÉÑ I YI WEMEDE ?


INYUKII U NLAMA YÉÑ I YI WEMEDE ?

 

         Di nla kobol i buk ini le yéñni kal le hala a yé i wan le u léba ngim yom tole ngim jam u nyi bé tole u nok bé i ke bisu.

 

Di nla kobol i buk ini le yini kal le hala a yé i tééda i bôñai jam u ntehe tole u nigil tole u nok i ke bisu.

 

Mut a nlama yéñ i yi nyemede inyuule hala a nhôla nye i yi gwel nyemede ingéda jam li mpam, ni i yisemba mam ma nla téénga nye. Hala a mboñ le mut a nyi ane nyuu yé ingéda je, ingéda nyôba,ingéda ba nsuunyenyumbi to sañ to ingéda ba ntjak hop libai i ke bisu.

 

Ingéda mut a nyi nyemede hala wee a nwas libak li maange.  . Hala wee a nnañ. Hala wee a nyi i mam ma mboñnye le a nwéha bé bôt nyuu niñ a niñ .Ingéda u nyi wemede, u nla yisemba ngim makon.Ingéda u nyi wemede, u nyi bilem gwoñ bi lam ni bi be .Jon u nok le :Ngwo i yijôijé ni ñem.

 

 

 

 

Yaônde, 26 dipos 2015

NkamPondiPondi

http://antoinepondipondi.blogspot.com