HÉMLE
HILÔLÔMBI I NTI BOTÑEM
Di nla kobol i buk ini le hémle ni kal
le hala a yé le, u nhoñol le ngim yom tole
ngim nañ bi yé mbale , bi yé ntiig le njel mpénda i yom i to i ñañ u, i tabé .Di
nlakal le hémle i yé lineebe le u mbat
bé mbadga yokiyo. Jon u nok le: hémle i
mpa dikôa inyuule hémle i nti we botñem, i
nti we mapide, i nti ki we ngui i boñ ngim jam to i niñ u neebe le u
niñ.
Di
nla kobol i buk ini le Hilôlômbi ni kal
le a gwé liyééne, jon ba nsébél nye le libôk
li nkumdum, a bak ki mut. A nla om mbu wé mbog yosôna. Won ba nsébél le Njombongo.
Kikii Hilôlômbi a yé mut, a ngwés i bôt ba ngwélél nye, a yé maséé ni bihégél gwé,
a mbén béba ni bisat. Jon ba nsébél nye le Sukmak.
Hilôlômbi a bi yis bôt ba kôba jôi jé inyuu
i tibil yi nye. Jon hala a yé longe le u
yi jôi li Hilôlômbi ndi u yi ki gwébél jo. Inyuu. Hala nyen Ba nsébél nye le Béndélmandum. Hilôlômbi a yé Bayemlikok hala wee a nla yémbél mam
momasôna, nyen a nyi mam momasôna. Jon ba
nsébél nyé le Mal yi. Ba séblag ki nye
Batuupék.
Bôt ba kôba ba bé yi le Hilôlômbi a ntôn
ni bo jon ba bé yugyana nye nduñ yap yosôna inyuule a yé Mal mam. Nyen a nti niñ, nyen
a nkit le i len ini a nyoñ we. Jon ba nsébél nye le Pot li mal. Tole Hônd kéna. Nyen a nsayap i nwet a ngwés inyuu
hala nyen u nok le njee a ngwal nu man. U nok ki le, ba og bé nsaaibag. Jon Hilôlômbi a yé Mal kal. Nyen a bi yémbél i bôt ba bé jôs bôt ba kôba gwét i Ngog Lituba
le ba jôp i base baôm mbom isi. Jon ba nsébél nye le Nwet ngui yosô. Jon u nok le: u
nôñlag mabal , u nyo bé nsuk lép. Hala wee u bénge bañ maboñog ma bôt tigale
u boñ bé longe. Jon
u bôdôl ni Hilôlômbi. U ba bañ ngog baagene inyuu maaisoñ to mut woñ libôk. U tam
bañ yom i maaisoñ, u ke bañ maaisoñ njôñ, u nip bañ. Ingéda jam li mboñ we, u bénge ibale bo we bé nyen u
yé ni njom. U téénga bañ yik mudaa to
man nyuu inyuule Hilôlômbi nyen a ntat bo. Jon ba nsébél
nye le Nwet mbog. U yi lômbôl Hilôlômbi mam moñ, a kôble we. Nyen a bi bot libii li muulôm ni mudaa le ba bana matam. Jon ba
nsébél nye le Nheg matén. Hilôlômbi
a bi gwés bôt ba kôbôl jon a bi ti bo yi ni pék le ba ôô bisélél gwap, le ba
sal bijek gwap, le ba ba kunde ibale bo ndi ba ngwélél mambén mé. Jon ba nsébél
Hilôlômbi le Kimaltjai inyuule maliga
mé ma yé nlélém tjai di tjai. I mam a mbôn a nyônôs mo. Ngéda Hilôlômbi i ta bé ngéda mut jon ba nsébél nye
le Hañngaa. Jon we nyen u yéñ Hilôlômbi. U kon bañ woñi. Inyuu i mam mana momasôna nyen bôt ba kôba ba bé kal le Hilôlômbi a yé
i ñem i hikii man mee. Jon ba nsébél Hilôlômbi
le Nu a bé, Nu a yé, Nu a nlo ni Nu a ba.
Maboñog moñ ni mahoñol moñ mon ma yis we Hilôlômbi.
Di nla kobol i buk
ini le botñem ni kal le hala wee u nhoñol le wa kôhna ndimbhe ni i jam u mbemb. Hala wee u mpide ngim yom, hala wee mapide moñ u mbemb mo ni ngim
mut inyuule u nyéñ manjel momasôna u ntehe bé ndimbhe ni wemede jon u nigbe ngim
mut tole ngim yom. Yom
u nlama yi, yo ini le, libôm li njiñnge li
ha bé yom. Inyuu hala nyen u nlama bé bii niñ yoñ i moo ma mut binam. U nlama yéñ
i sélés boña woñ, le u niñ ni pék, le u sal ni moo moñ. U nlama yéñ ndi wa léba i njel
u nlama noñ. U nlama ba mut mban. U yi ni le mut a modob a nla bé kôhna jam.
Jon u nok le: koo i nje bé i édi. Ingéda u nheñ ni wemede u nla bana botñem le
ni mahôla ma Hilôlômbi wa pam i homa u ngwés ke. Jon u kenek u lalal a yémbél ntôndôô liké. Mut a yé a ba a gwé botñem
le kikii a nañ, a bii, a bot mboda. Mut a yé a ba a gwé botñem le, ingéda a
kôhna mambôgi, a léba nson. Mut a yé a ba a gwé botñem le, a bumbul i yom a
nsal. Mut a yé a ba a gwé botñem le, binoode bi mam a mboma, a yémbél mo. Mut a
yé a gwé botñem le, ibale a yé nkol, a ba ngwélés mut. Mut a yé a ba a gwé botñem le, a bana nkus inyuu i yibil sabe nyunga.
Mut a yé a ba a gwé botñem le, a bañ bee inyuu mbôô wé. Mut a yé a ba a gwé botñem le, a yoñ ane inyuu i lona mahol i loñ yéé i
ke bisu. Yom u nlama yi, yo ini le, ibale bo ndi u
gwé habé botñem, wee niñ i mal we.
Hémle Hilôlômbi i nti botñem. I botñem ini i ta bé botñem
i mut binam. I yé ngui Hilôlômbi a nti mut a nhémle nye i pes i mbôô wé minsôn
ni i mbu, ngui i pes nson, ngui i nlaa yidis wemede le u ke bañ i nkoda jel, le
u jôp bañ manjel i bôk mambén ma Hilôlômbi,
le u ke bañ biyôglô bi mam i ke bisu. Hilôlômbi a nti we ngui i gwés niñ ni i
ba i niñ, i yi bok mam moñ, i yi bégés ni ti Hilôlômbi lipém li kôli ni nye.
Ngui Hilôlômbi i mboñ we le u bana bôdôl ñem ni wemede ingéda u nhémle Hilôlômbi.
Yaônde,
27 maye sép2014
Nkam
PondiPondi
http://antoinepondipondi.blogspot.com