jeudi 11 mars 2010

HÉMLE NI MBOG

HÉMLE NI MBOG

Di nla kobol i bug ini le hémle ni kal le hala a yé ngim nson bôt ba nsal. Jon hémle i nhéñha ni ngéda. Sañ i mahoñol i njuba tole gwét bi nla juba inyu i boñ le bôt ba bana hémle.

Ingéda bôt ba kôba ba bé ikété Ngog Lituba, ngim bon ba mee i bé hémle le liemb li nla boñ le ba yémbél i bôt ba bé jôs bo gwét. Bon ba mee bape ba bi ha bôdôl yap yag Hilôlômbi ni mahoñol mana le, ndigi nyetama nyen a nla tohol litén li mee. Kikii litén li mee li nyémbél i gwét bini, ndi base i sôkbôk i lo. I base ini i bi héñha i hémle bon ba mee ba bé ba gwé noñnaga ni liemb, ngambi i ke bisu. Jon u nog le, ngambi i nkomol bé Hilôlômbi.

Mbog i nyibil bilap. Hala wee mbog i mboñ mut le a sélés boña wé inyu i yi lelaa mam ma nke, hee mbale i sôli i ke bisu. I njel ini mut a nyoñ inyu i yi mbog i tabé ngwa. Jon u nog le, mbog i yé makwo ma ñyéé, mbog i kwog, mbog i nyodag. U nogog ki le, yi i yé miño mi lép. Bambombog ni mintôô mi bôt bon ba bi boñ le bon ba mee ba kônde bana yi ni i njel ini le hémle yap i bi tinde bo le ba ôô bisélél gwap, ba ôt mahoñol inyu i ti maôñ, ba léba bee inyu i tibil makon, ba oo tjôdôt môi, ba léba lelaa ba nla nol binuga, ba bana nko ni toga i ke bisu.

Libogog li niñ lini jon li bi boñ le Hilôlômbi a bé i ñem i hikii man mee. Jon man mee a bé nigbene i tôl Hilôlômbi, a yik le Hilôlômbi a yé nye banga mahôla.

Ngim biyi i yé bilembe. Gwon bi nlo i ôbôs base. Jon u nlama badba le : kii i yé mbog base? Inyule mbog base i mbagla bé ni mbañ. I mut a nkal we le mabui u ngwélél ma yé sat, nye a nyoñ mabui mana ni ndoñol u nti nye inyu i tibil bôt bé ni bañ bee bi a nuñul ni nkoñ isi i ke bisu. Jon u nog le, ba nkés bé mbog i ngii mbog. Libogog li mam ma ntôñ i base li nla boñ le hémle i sôs ni i njel ini le ngim liboñog li mam i nhoñol le i nla timbhe hikii yom i ke bisu.

Isañ a yé mut a mbôdôl ngim yom, mut a nyis bôt ngim jam. Bôt ba kôba ba bé yi bé jôi li Hilôlômbi inyule Hilôlômbi a gwé bé nwaa ndi ba bé yi môi méé mape, ma ma ñunda kikii a bi heg ngii ni isi hala wee Batuupék ni nson wé, hala wee Njombongo. I môi mana ma ñunda mbog i gwé nwaa. Jon u ntehe le ngii i tabé isi, malép ma tabé môô, mbén i nti ndoñol ni nwaa i hikii yom. Mut a nyéñ i yi mam ndi mut a nyi bé bisu bi mbog.

Yom u nlama tééda, yo ini le, mbog ni hémle bi yékna bé. I mut a nyan mbog yé a nyila wañ mut, hémle yé i nla habé hôla nye i bana yi ni pék. Inyule i yi ni pék mut a mbana, mut numpe a nla bé héya gwo.

Yaônde, 01 matumb 2010

Nkam Pondi Pondi

http://antoinepondipondi.blogspot.com

Aucun commentaire: