NSEÑ I LOÑ

NSEÑ I LOÑ

Di nla kobol i bug ini le nseñ ni kal le hala a yé yom tole jam li nlama bôña inyu ngim mahee ma mut.

Di nla kobol i bug ini le loñ ni kal le hala a yé hisi i ngim litén tole ngim matén, mboda bôt ba yii mu i nkoñ u, baôô bisélél ni basal minson. Di nla ki kal le loñ i yé lingwélés.

Loñ i ngwé, loñ i niñ, loñ i nla tjé hala wee ngim loñ i nla yin. Jon loñ i nla wo. Bon ba loñ ba nlama jo sañ le loñ yap i yin bañ ni i njel ini le ba nlama yi bok mam map le mut nyekinye a ba bañ i ngii loñ. Jon u nog le, mut a nje njék ndi mut a nje bé loñ. Bon ba loñ ba nlama nôgla inyu i ôô bisélél gwap, inyu i bañ bee gwap, inyu i sal bijek gwap ni nuñul bisélél gwap, bee gwap ni bijek gwap inyu i boñ le mut nyekinye a yep bañ ni jis li mbôngôô. Bon ba loñ ba nlama ba bôt ba nsal ni mban inyule i loñ i mbégés bé ngeñ i nhol bé. Bon ba loñ ba nlama yéñ i kônde bana yi ni pék inyule yi i ngi kônde i nteg bé mal. Jon bon ba loñ ba nlama sal inyu mahol ma hikii jô ni mahol ma loñ inyu hala nyen nuga i gwém u nyugege i hot yoñ.

Bôt ba kôba ba bé yi le ibale loñ yoñ i tabé ngwélés wee yag we u tabé ngwélés. Jon mut a bé ke bé yag mbombog moo nso. Hala wee mut a nlama yéñ le a yi i yom a mboñ inyu loñ yéé ilole a yéñ kii loñ i mboñ inyu yéé.

Loñ yoñ i nla ndigi unbene loñ ipe ingéda i nla kokse i loñ ipe ini inyule lôs i tane bé i hunguu mis.

Yom u nlama yi, yo ini le, ingéda loñ yoñ i gwé lipémba, biloñ bipe bi nkon loñ yoñ woñi yag bon ba loñ yoñ inyule lihuu li ngoi wee ngoi i.

Yaônde, 10 kondoñ 2011

Nkam Pondi Pondi

http://antoinepondipondi.blogspot.com