Di nla kobol i bug ini ni kal le hala a yé ngaba mut a
nti mut numpe i hôla nye i boñ ngim jam, ngim nson i ke bisu.
Di nla ki kobol i bug ini ni kal le hala a yé ngôô mut
a gwééne mut numpe inyuu i boñ le a bana ngim jam, tole a yila banga mut tole a
tehe mapubi ma ngim yom i ke bisu. Jon u nog le: bale he jôm bé, ki ngôs i téé hee ñoñ? Mu i njel i nyen mut a nla
sébél i bôt ba ngi gwéé ngap le ba hôla nye. Jon u nog le: hônd i kwoo man basoo i lép, nye bôt ba mis le loga.
Mut a nlama bé ndigi bemb mahôla inyuu i sal nson wéé.
Jon u nog le: mahôla ma mbôk bé bak.
U
nogog ki le : liseng a kali, nye
nwet mbai a kee hilo, ndina ni me ? Hala wee u nlama nyôs nyuu i nson woñ inyuule i mut a
nlo i hôla we a nlama nôgda le u yé nwet i jam joñ. U nlédés moo.
Mut a nlama bé kééha moo i tôl. Jon u nog le: makôô ma jéha ngwo. Mut a nlama yi le
matam a bana i nson a nsal mon ma ti nye mahôla i bana ki mam mape. Jon u nog le : malép ma loo i njok, mon ma lamb njok.
Inyuu hala nyen u nlama ndugi unda ndaaba yoñ to ibale bo ndi u nyéñ mahôla.
Inyuule mahôla wa kôs ma yônôs bé ngôñ yoñ yosôna to mélés ngôñ yosôna ni jam
joñ.
Yom di
nyi, yo ini le mut a nla bé niñ le a bana bé ngôñ ni mahôla ma mut numpe inyuu
hala nyen bôt ba nlama hôlna. Jon u nog
le : Gwelna gwelna bileñ bi nyôl.
Yom u
nlama yi, yo ini le, ibale ba nhôla we, yag we u nlama hôla mut numpe. U nlama
bé niñ le u mbemb ndigi mahôla. Wee u ta habé ngwélés. Nlélém ni i loñ i niñil
mahôla.
Banga
nhémle a nyi le a nlama heñ ni nyemede ndi to a bana mahôla ma Hilôlômbi.
Mahôla
ma gwé mis. Jon mut a nlama ndugi hôla bôt bé. Jon u nog le : libanga a yék nugus tén yéé, a ke i nugus i yañan.
Yom u
nlama tééda, yo ini le, mahôla ma yé ngandag mintén. U gwé mahôla ma mut bo
mut, mahôla ma nlôñ, mahôla ma ntôñ, mahôla ma bikéhene, mahôla ma ngomin,
mahôla ma nkén loñ i ke bisu.
Yaônde,
06 hilônde 2012
Nkam
Pondi Pondi
Aucun commentaire:
Enregistrer un commentaire