jeudi 31 mars 2016

NJEL MBÉN


NJEL MBÉN

 

        I yé ntjep i mbén i ñunda manjel ma mbok ni ti bikéhene ngui i nwan mahop, i kéés mahop ni i gwélél mbagi bikéhene le i yon ni yiba.

        Di nla ki kal le njel mbén i nkal i mam ma nlama bôña i nwaa nkéés a njôp ikété mbén le a pémés mbagi hop.

        Di nla kal le njel mbén i ñunda maông, i nkal we kikii u nlama téé makôô, i mam u nlama boñ ni i mam i ñane we le u nlama boñ tigale pos i jôp matiñ ni nneebe tole i mbén ni ngwés gwélél.

        Njel mbén i yé minkogo mi matiñ mi nyis we i mam u nlama ndugi boñ noñnaga ni mbén tas, mbén nteba, mbén maoñ, mbén nyunga, mbén jem, mbén nson, mbén disi, mbén ngomin i ke bisu le mut nyekinye a nlama bé bôk. Tigale a ke habé ni bisu inyuule a kônde ke i jam a mboñ li li gwé habé mahee. Njel mbén i nneebe bé i jam li.

        Yom u nlama tééda, yo ini le, njel mbén i ntat le yubda i ba bañ ni i njel ini le u nlama nôñôl hi kokok. I yom njel mbén i nyi bé, u nla bé jubus yo ikété njel mbén wee u mbôk mbén. Njel mbén yon i ntééda kunde bikéhene, mambén, bôt ba binam, matiñ i ke bisu.

Yaônde, 15 matumb 2016

NkamPondiPondi

http://antoinepondipondi.blogspot.com

 

Aucun commentaire: