Ñañ

 ba binam, hala a mboñ we le u nôgda le u yé jô i ngim pes mbog i i bi gwéé i nwaa we u bé gwéé i ya nom ki ngandag i mbus nyemb yoñ. I ngéda u nyi bé ñañ woñ, ñañ li lngéda u nyi ñañ i bôt haa joñ, ñañ litén joñ to ñañ u Ioñ yoñ, u yé wang mut. Yag lihaa joñ, litén joñ to loñ yoñ bi nene ndigi wee bi gwéé bé minkañ. Hala a mboñ le i mam ma ngwéla i len ini ni nok bé mo ndi to yi mo ni nyi bé mo. Ñañ i nti we bilonge bi biniigana bi mam wa ñiñ ni i njel ini le u mboñ habé dihôha di bôt ba bak we bisu. Ñañ i mboñ we le u nyi biloñ bipe. Jon u nog le, hiki Ioñ ni héé hibél hi kôp. Liyi ñañ Ii nla téénga mut inyuu maliga ma mut a ngwés bé nog. Mu i njel i nyen mut a nla batba le inyuu kii lini jam li bi bôña ? Lelaa lini jam li bi bôña ? Inyuu i boñ le u tééda i jam ba ñañle we, u nlama yi gwel wemede ni tiige i mut a mpot. Jon u nog le, ñañ u tabé joo li ngôlôñ. Mu i njel ki i nyen u nog le, ñañ manyañ le lilagle. Nseñ u ñañ u yé le u yiba, le bôt ba yi ñañ i mbog kôba ni kwañ. Jon u gwé ñañ i base, ñañ i likenge, ñañ i ngii ni hisi, ñañ i ngim mbai, ñañ i ngim mut tole ñañ i ngim mudaa,  ñañ i mintonba, ñañ i loñ, ñañ i bikéhene, ñañ i nkaa kunde, ñañ i lijo gwét i ke ni bisu. Jon u nog ki le, nlôm njel a kennga ñañ. Ngim mut tole ngim loñ i nla bep añal ngim ñañ. I jam li, li tabé longe. Inyuu hala nyen bayi ñañ bon ba hômôg i nkék njal. Inyuule ngim bôt yon i kôli i añal ngim ñañ i ngim ba homa ni i ngim ma ngéda. Jon u nog le ñañ mbe i nkola bé ni mim pa. Ndi yom di nyi, yo ini le, mpot bindéé a gwé bé lipém i loñ yé. Mu i njel i nyen u nog le, jôñ mut i loona ntet ka.

Yaoundé, 31 njéba 2001

 

Nkam PONDI PONDI

 

http://antoinepondipondi.blogspot.com