LIBOK MAÉA
(Makôô ma mim ma mbénge nwet)
Di nla kobol i ngén ini ni kal le ingéda mut a nwo, maéa mé
ni majôna mé ma mbénge ndap yé bôt. Hala
wee ndap yé bôt yon i mbok maéa ni majôna.
Ingéda
bôt ba kôba base i sôkbôk i bé mbénge bé
jam li maéa to jam li majôna.
I kel
majôna bôt ba ndap bôt ba nyén bisu bi soñ i ntima. I waalôm ntôñ base ni kôa
bon ba nyén ibale bo ba yé i base. I waalôm ntôñ i base bôt ba nyén ha, ba yé
ngomin, bikiñe, bambombog, mintôô mi bôt. I waaé bôt ba ndap bôt, babot bon ba
nyén ha. I waaé babot, bakil ba mbégdé ni ba mbééga bon ba nyén. I waaé wap,
mawanda ni bayina bon ba nyén. Ba nyis loñ i mut a nwo le i nun bôt ba ndap
bôt.
I bôt ba
ngwé kunde hop majôna bon ba yé nkugi bum, babot, bakil, loñ ibale mbombog a yé
nyen a mpot, ibale a ta bé nsii mut, tole mañ mut tole mpôdôl loñ. Mpôdôl loñ a
yé tel bambombog ba nti ngim mut. Nwet maéa a nyoñ hop inyuu i toñol niñ i mut
a niñi mim inyuule hikii mbai i gwé i wé
ñem kédé ngii. Nwet a nsôk yoñ hop a yé nkugi bum nu a bak a bép ntoñ i
nyôl le i nwaa bôt ba nti mbôgi.
Liso moo
li ntagbe i mbus dilo di na inyuu mudaa, dilo di tan inyuu munlôm. Ba ñañ bé i
kel ba njô mim. I kel liso moo nkugi bum a ntimbhe mambadga bôt ba mbat nye i
kel majôna.
Ndumb i
nla tagbe i mbus dilo bôô. Ba ñañ bé i kel ba njô mim. Ndumb ngobol yé i yé i
kôp nsañ i bum i mut a nwo ni li téé nwet bum. Ingéda ndumb i ntagbe, wee maéa
ma mmal. Hop u ta habé.
Yaônde, 02 mpuye 2019
Nkam
PONDI PONDI
http://antoinepondipondi.blogspot.com
Aucun commentaire:
Enregistrer un commentaire