MODOP
Di nla kobol i bug ini ni kal le hala a yé mut a nyén nwee ikété liyot. Hala a yé ki mut a gwé libak li nwet a tabé maséé, mut a yé ngoo le a gwé bé bigwel moo, mut nu mandutu ma ñyuu i ke ni bisu.
Man mee a yodop i len ini inyule a mbôk mbén Hilôlômbi ni i njel ini le a nyo maog ni je bijek bi biloñ bi ñane nye. Jon man mee a nyila kol maog, jon bonge ba mbégés habé bagwal bap, bakiya ba nnôgôl habé banyôgôl bap. Mu i njel i nyen bonge ba ntehe bagwal bap hindi nso inyule ba mpot niñ bagwal bap i kel majôna. Ingéda u yé nkol mut, nwet woñ a nkal we i yom u nlama boñ ndi nye ingéda i nlélém jam u mpémél nye, a mboñ bé kikii a nkal i nkol wé. Jon man mee a nyi habé manyii, nseñ i loñ mee, ngôô inyu maaisañ, nseñ i boñ jam ntôñ ni maaisañ, nseñ matila i ke ni bisu. Yôi nyen a kal Njé, nye a Njé ké béñba, ibale u mbéñba bé, kindba.
Mut a nlama bé modop inyule mandutu ma sôli ikété mahak. Hala wee niñ i yé yi ni sañ. Mut a nlama yéñ ndi a léba. Mut a nlama sélés boña wé inyu i boñ le a niñ longe. Jon u nog le liyot li net bé nkaa. Hala wee liyot li mboñ le su woñ i nene bé lam, liyot li ôbôs libag joñ li minyaô. Inyu i boñ le u modop bañ, u nlama ba mut bôt. Mam ma niñ ma ntinde we le u kônde bana yi ni pék. Jon u nlama tila ni añ. Niñ i bi lo lelaa ? Lelaa i nyodi litjee i ke i kôp ? Kii yé kiñ-ñem ? Inyu kii di nla bé ba bahoma ibaa i nlélém ngéda ? Libag li ngéda li yé lelaa? Hee mahoñol més ma nlôl ? Kii i boñ le mut a yé tôbôtôbô ? B’a ngim yom i yé le ngéda ? B’a i yaani a bi tagbe ni i yaani nu a nlo (likee) bi yé nlélém ? B’a mbog bôt ba niñil i yé jomb ? Inyu kii ngim yom i yé i lel yanga yom ? B’a ngii ni hisi bipe bi yé?
Mut a nlama bé modop tigale a yi bé nseñ i niñ. A ba bé ngwélés.
Yaônde, 20 libui li ñyéé 2008
Nkam Pondi Pondi
Aucun commentaire:
Enregistrer un commentaire