NGINDA HIBEE HI I JEK BATÖLE
Di nla kobol i ngén ini ni kal le mut a nla bé yémbél Hilôlômbi ibale bo u nti nye mam moñ inyule Hilôlômbi a yé Bayemlikok.
Ingéda u nti Hilôlômbi mam moñ wee u neebe i nigbene i tôl yé, wee u nkit le u nti Hilôlômbi bibégés. Libégés Hilôlômbi li yé i ti nye makak. Inyule hala a yé pil. Nyen a bi pémés bôt ba kôba i Ngog Lituba. A unda bo gwéha yé ni i njel ini le nye a nyônôs makak méé jon a yé Kimaltjai. Ndi a man mee makak moñ inyu Hilôlômbi u nyônôs mo ? Bôt ba kôba ba bi bot liada ni Hilôlômbi. Ba neebe i niñ ni mambén ma Hilôlômbi. Mbén bisu yon i yé le, u je bañ bijek, u nyo bañ maog ma loñ i ane we tigale u yila nkol i loñ i. Mbén yôhne ibaa yon i yé le, a man mee u uñul bañ biték gwoñ mut a tabé man mee. Mbén yôhne iaa yon i yé le, munlôm a haba bañ mbod muda yak muda a haba bañ mbod munlôm. U añle hikii man mee ni bayina boñ minson mi Hilôlômbi. U bana suhul nyuu. U yéñ yi ni pék Batuupék. U yi ti Hilôlômbi mayéga inyu bilonge bi mam a mbôñôl we. U hôya bañ masoohee ma Hilôlômbi mon ma yé le :
A nwet wem Hilôlômbi ,
Me mbat we nwéhél inyu maboñog me, mahoñol mem ni bipôdôl gwem bibe,
Me nsoohe we le, u ti me ngui i yi gwélél mambén moñ ni i yi bog mam,
U kôm bañ me mbus tiga le me yôm, me yila nkol, me yi habé niñ i kunde inyu i sal memede ni i ti we bibégés ni lipém bi kôli ni we,
U ti me yi ni pék yosôna kikii sõmbôl yoñ inyu i boñ le,me yi le , wetama nyen u yé Hilôlômbi, liaa jem.
Yaônde, 25 libui li ñyéé 2008
Nkam Pondi Pondi
http://antoinepondipondi.blogspot.com
Aucun commentaire:
Enregistrer un commentaire