mardi 2 février 2010

LELAA U NLA BOMA HILÔLÔMBI ?

LELAA U NLA BOMA HILÔLÔMBI ?

U nlama yoñ ngéda inyu i boma Hilôlômbi. Hala wee u nlama yoñ ngéda inyu i soohe. Inyule masoohe ma tabé tjagatjaga. Jon u nlama yoñ ngim ngéda inyu masoohe. Hala wee u nlama yoñ ngim ngéda inyu Hilôlômbi. Ingéda u nsoohe, hanyen u mpôdôs Hilôlômbi. U nkal nye mam moñ, malam ni mabe. U ñôm bé mut nyekinye nsohi inyule Hilôlômbi a nyi i mam ma ntéénga we. Hémle yoñ i mboñ we le u nyi le u nlama nigbene yag Hilôlômbi, nyen a nti we ngui i yémbél mam ma niñ yoñ ingéda u yiplene nye ñem woñ. Ingéda u gwé banga hémle, u ntôñ bé ni jam jokijo. Inyule Hilôlômbi a ti we nsañ, ñem woñ wa ba ni hogbe ni mahoñol moñ. Ingéda u nhôya bé Hilôlômbi u niñ ikété sôkbôk maséé. Jon u hôya bañ biniigana bi Hilôlômbi, Ntohol woñ. Nyen a bi tohol bôt ba kôba i Ngog Lituba.

Yaônde, 23 kondoñ 2010

Nkam Pondi Pondi

http://antoinepondipondi.blogspot.com

Aucun commentaire: