ANE I MONI NI MONI ANE

Di nla kobol ane i moni ni kal le ngim bôt i mbégés ni ti nhat mut lipém. Hala wee ba mbénge bé i het moni nu a nlôl, ba mbénge bé libak li mut, bilém gwé i ke bisu. Jon u nok le : mut moni a net nkaa lama. U nogok ki le : i maange a bééga hikamba hi nyik nyen ngwo i noñ. Hala wee bôt ba ngwés mut a gwé tjom, moni nyen a nyidis mut i ane i moni. Hala a yé nlélém ni biloñ.

Di nla kobol moni ane ni kal le hala a yé moni mut a nkôs noñnaga ni tel yé i ane. Hala wee ane i nla bok mam i nya i yéle u kôli ni libim li moni inyuu i sal nson woñ ikété telepsép ni nson i loñ i mbéda we. Jon u nok le: nkol ni môô i gwep. Ndi mut numpe tole ngim bôt i nla nip moni mi loñ inyuule tel yé tole tel yap i nti bo njel i gwélél moni mi ane. Jon i mut nunu to i ngim bôt ini moni ane a nhôla bo i ba minhat mi bôt.

Mut a nhémle Hilôlômbi a ta bé nkol moni, a nyi le a nlama saa mut a nsélél nye. Jon u nok le: ba njôwa bé hu njé ni matai. Mut a nhémle Hilôlômbi a nyi le a nlama saa pil wé ingéda ba nkôle nye moni. Jon u nok le : to u nkap bé, u tjak mapil. Mut a nhémle Hilôlômbi moni mi nyilis bé nye jôñ. Jon u nok le: Hônd Tulak a hôô lihat, a bôm lingo li kul. Mut nu moni nyen a ñane, a njôp i manjel matjiba. A mbénge bé yom ipe ndigi moni. U handab nye i njel a nkuhul moni, a nol we to tjé nwa wé to man wé. A neebe ki i jôp manjel mabe momasôna a nkuhul moni, nyen a nkal le moni a gwé bé njiñ, to njañ yé mut a nyi bé. Jon inyuu linjañ li moni, a njôb bibase bi be, a kenek bisume, a témék bôt i nuñul bihés i ke bisu. Lisuk jé li yé ndigi tjiba, to a nyék soso mbai i njôp i put. Mut a nla bé yén mu.

Inyuu hala nyen hikii mut a nlama yéñ le a niñ longe niñ. Jon u nok le: kul nye hikii mut a kéénege bot i ntel wé.  

Masoda ni nu a nkil hi kokok.

Yaônde, 12 matôp 2014

Nkam Pondi Pondi

http://antoinepondipondi.blogspot.com