ANE
MAKIÑ
Di
nla kobol i buk ini ni kal le hala a yé ane i nkiha ni
sômbôl loñ ni i njel ini le hikii jô i nti mahoñol méé, hikii jô i ntep bakena
loñ, hikii jô i yé kunde i bénge nson u bakena loñ. Yak isañ bon ingéda a
nsômbôl kit jam, a nôgla ni bon bé wada wada ndugi ndi to bobasôna ba nôgla.
Bôt ba kôba
ba bi ték mbog. Jon inyuu i ba mbombog, mut a nkena loñ, nteba u mbôdôl i boñ
hala wee bilôg bi nyañ. Bon ba mbôdôl ntep mbombog. I mbus yap, nteba i nke i juu, hala wee bilôg bi isañ bon ba ntep
mbombog. I mbus ndap bôt i ntep. Bôt ba noñ ha, ba yé litén. Bôt ba nsôk ba yé
loñ. Hikii homa mu nteba u ntagbe.
Bôt ba kôba ba bi bot ngand mbog
hikii nwi. Nson u ngand mbog i yé :
bénge nson u mbombog hikii nwi. Mbombog a nsuha bot yé i mbog. Dikoo di mbog di
nwan nson u mbombog ni manjelek ma bôt. Ngéda mam ma ntagbe longe le loñ i yé maséé,
loñ i mbat mbombog le a jés bôt. Mbombog a mbat le ba lona nye nlôm ntômba.
Bôt ba ngwel i ntômba ini bitoñ gwé,
mbombog a ñôm nye mbom yé. Mbombog a nkal bo le
ba nwas ntômba. Ntômba i bé i témb ni mbus ndi to i nkwo. Hanyen mbombog a nkal loñ le jega. Nsude mut i nje bé i ntômba
ini. Bambombog ba bé hôm ni sômbsômb ngwélés. Ibale bôt ba mbat bambombog le ba
sak, sômbsômb ngwélés nyen a nyibil likok. Ibale bo a nyibil bé masak bambombog
ba nsak bé. Lilok li mbombog li yé lihôngô. Ingéda mbombog a mpôp, a ntémb a
yoñ bot yé i mbog. Ibale mbombog a nip tole a jôp i jimb libe tole a mbep kena
loñ, a nidba nyemede.
Ane makiñ i nkéñ le yubda i jôp bañ inyuule ane i nla bet mut i ño, i
yumus nye. Jon u nok le: ñem u nsôngôô
bé njé. U nogok ki le: batôle ba ntulul bé singi. Hikii man
loñ a nlama ke i nteba, a nlama tjél bitek inyuule bitek
bi nla nol ane makiñ. I yom loñ i nkit hikii man loñ a nlama bégés yo inyuule
kiñ loñ i yé kiñ Hilôlômbi. Jon u nok le : Mut a nje njék ndi mut a nje
bé loñ. Mut nyensôna a yé nseñ inyuu
ane makiñ. Jon u nok le: wañ i ta bé
linyañ. Ane makiñ i yé jam bôt ba kôba ba bi jubus i mbog yés. Inyuu hala
nyen man mee a nlama jo sañ le ane makiñ i wo bañ. Hala a yé ngim pil inyuu man
mee. Jon u nok le: mbog i yé makwo ma
ñyéé, mbog i kwok mbog i nyodag. Jon man mee a nlama sôñ
ane makiñ inyuule ane makiñ i ntat le bikéhene bi ba kunde,jon u gwé bikéhene
bi bisu, bikéhene bi hohol hop ni bikéhene bi ôm tuk gwét, le likot masangô ni
mayi ma mbog bi kiha noñnaga ni mbog yés. Basôñ le ane makiñ i wo bañ ba yé
bôôlôm, bôdaa ni boonge noñnaga ni mam ba ngwel hikii kel.
I loñ mee nteba i bé tagbe inyuu hikii tel. Hala a mboñ le mut a nyi le ba ntep nye inyuu ngim nson a nlama sal. Jon
a nlama nyôs nyuu i nson. A nlama kil hi kokok.
Ane makiñ i nlona manôgla, nsañ, mahol i ke bisu. I loñ mee mut a mbép bé woo i
tôl nye a mboñ tole nye ba ti ndi bôt bon ba béé ba ti nye. I jam lini li mbôña
nwet jam nyemede a nyi bé. Jon di nla kal le ane makiñ i ñad bôt.
Yaônde, 07 matôp
2015
Nkam Pondi
Pondi
Aucun commentaire:
Enregistrer un commentaire