MBOG NI LIYIBIL BILAP
Ingéda u nkot bi bi mpôôna homa wada ndi u kahal aňal inyuu i
nson bi nsal hanyen a yé mbog. I buk ini le mbog i nlôl i buk ini le bok.
Liyibil bilap a yé i yi mam ma sôli ikédé gwom u mbok.
Hilôlômbi a yé nwet mbog i bôdôl i gwom ba mbôble i moo, i
ke bi ba ntehe ni mis kikii bo ond, i tagbe bi ba nyil i nok ni maôô i ke bisu.
Hilôlômbi a yé nwet mbog inyuule nyen a bi heg mut binam, bihégél gwobisôna,
nkoň hisi, ngii, tuye i ke bisu. Hilôlômbi nyen a bi ti mut binam pék i hôla mut
i yi mam, i yi ti ndoňol ni i mam a ntehe, a nnôgda tole a nnok. Hala wee mut a
yi ôt mahoňol ni nyemede ni i jam a mboma to li lam bo li be inyuu i tep nyemede
imbee njel a nlama noň ingéda a mboma ngim jam. Inyuu hala nyen mut a nsélés boňa
wé inyuu i yi bok mam, inyuu i yi nok mam ni inyuu i yi kit mam le jam jokijo
li puhe baň nye. Ndi pék mut I nla bé ba kikii pék Hilôlômbi
nu ba nsébél ki le Batuupék. Pék mut i mboň nye le a nyi bagal mbog bihégél ni mbog
ndômbôl. Bôt ba kôba ba bé yi le mbog i nlôl ni Hilôlômbi jon ba bé sébél nye
le Nwet mbog.
Hilôlômbi nyen a nti yom niň, nyen a mbudul yom, a nyibil yom.
Hala wee a nyi mam ma sôli jon bôt ba kôba ba bé sébél Hilôlômbi le Nkindil hisi
inyuule nyen a bi ti bo yi ni pék le ba laa sal bijek gwap, le ba yi gwéhél lingwaň
li hisi kikii mpuma, muli, lingénd, gôl, bup i ke bisu inyuu i ôô bisélél gwap, bie ni mabui inyuu i yi baň
bee gwap I ke bisu. Liyibil bilap li
nhôla mut le a ba baň ikédé jiibe li ndim, hala wee Hilôlômbibi a bi hôla bôt ba
kôba le ba tehe mapubi, le ba ba ngwélés, le ba ba kunde,le ba niň longe niň i
ke bisu.
Mbog ni liyibil bilap bi nlôl ni Hilôlômbi jon bôt ba kôba ba
bé sébél ki Hilolômbi le Nu a bé, Nu a yé, Nu a nlo ni Nu a ba inyuule bindôndôô
gwé gwom bi ňunda bés le nyen a yé bibôdle, di ntehe i mam a mboň i len ini, di
nyi bé kikii kel i ňye, nyen ane yé ya yiba homa nyensôna ni nom i boga ni boga.
Yaônde, 05 njéba
2015
Nkam
Pondi Pondi
http://antoinepondipondi.blogspot.com
Aucun commentaire:
Enregistrer un commentaire