NOP

 

Hala a yé malép ma ntoi, ma lôkak i ond ndi ma kwok hisi. Nop a nno bé nlélém. U gwé nop makôs, nop hilônde, nop biôôm, nop bibabaya, nop tôtôi i ke bisu. Jon banop ba yé ngandag mintén. Nop a nno bé ndigi le ngii yosôna i nhénd. Nop a nla no le hiangaa hi bayak.

 

Nop hilônde a nno bé ni ngui. A mbéna no i sôñ samal i nwi. Nyen a nhindis bitôdô, a héhak bijek. Nop dipos a nno bé ni ngui. A yé a no a sem. A ntémb a no ki i mbus ngeñ ina. A bé béna no kôgôô. Nop dipos a nno i sôñ iaa. Bôdaa ba nkahal kôs bijek tole ba nkahal mabumbul. Nop biôôm a mbéna no i sôñ jôm i nwi. I nop nunu a nno ni ngui yak mbambat i yé i ba ngim mangéda. I nop nu yen a mboñ le tju di oo. Nop bibabaya a bé no i pôla sôñ jôm ni jôm ni yada. I nop nunu a nno ni ngui. I nop nunu a bé a no, hiangaa hi bai. Jon u nog le, nop a nkahal leñ makoñ ma ngwéé. Hala wee mbéng i mal. U nogog ki le, nop a nog, hiangaa hi bayak. Nop tôtôi a nno ni ngui, mbug mbebi i yé i ba i nhông yak matanga ma nla kwo. Nop tôtôi a mbéna no maye sép. I nop nunu nyen a mbéna héya minyôl mi mandap, nyen a nnup bie. Malép ma yé ma kôba hisi ngandag i nya i yéle, ma nla bôk miñyaanga, mandap. I ngandag malép ini, i nla kuu minloñ, i nla baa bôt ni binuga. Balom ba nhôl i ke bisu.

 

Ingéda  nop a nno, hala a mboñ le bijek bi nuk. Niñ i nla bé ba i nkoñ hisi ibale bo ndi nop a tabé. Ndi ingéda nop a nno, u yéñ le u ba i homa a yéle ngui malép ya boñ bé we béba. Ibale bo ndi u ñoñ ndap, u yéñ homa hisi le nop a nla bé bôk ndap yoñ i ke bisu.

 

Inyu i boñ le nop a téénga bañ niñ yés hana i nkoñ biték, di nlama yéñ i yi ingéda banop ba nôl ni bahoma ba nôl.

 

 

YAÔNDE. 05 dipos 2005

                                                                               Nkam PONDI PONDI           

 

                                                              http://antoinepondipondi.blogspot.com