dimanche 30 août 2015

NSEÑ I GWÉHA


NSEÑ I GWÉHA

I  mut a gwé gwéha a ta bé nhiômôg mut, a tabé mut a nneebe bitek, a yé mut a nyéñ  nsañ, mut  a nyéñ mahol, mut a mpot maliga, mut a nyi mapôhda. Jon u nok le : mapôhda ma nyambal gwéha. I mut a nyi gwéha a nneebe bé le ba tôôma nye ño ni maaisañ a ñunda bé bijôñ gwé bakén ba bôt jon u nok le : kôp i njôl bé i ntet. I mut a gwé  gwéha a niñ longe niñ. Bipuba bi tjôñ bi nkôhna bé woñi. Jon u nok le : ni ngwésna ni nsôôna bé diyindi. I mut a nyi gwéha   a nla neebe wél inyuu bilôg bisañ. Jon u nok le: hikii litén li gwé i wé téglaga ñyéé.

Bôt ba kôba ba bi yimbe le i ntôñ miñyéé, ñyéé  wada i bé i gwé mahuu ma nsela ni mini miñyéé nimpe. I téglaga ñyéé ini i bé neebe wo inyuu miñyéé mimpe ingéda njéé i noñ bo. I  ñôt njéé i pes yé. I téglaga ñyéé ini nyen miñyéé  mi mbééga bañ  minkôgô. Hala wee nyen a nsal minson nwomisôna. Ligwé li base li inyuu ngim bôt ni ngim biloñ. Mut  a nwél inyuu bôt bape. U nlama lôô i nyeni ndi u pam yak Ntohol woñ. Hala a nlona linyandi ni gwét inyuu mut a ntjél i base i. Base i sôkbôk i yé ntéñék ni gwéha. Base  i yé liada li bôt ni Hilôlômbi. Hilôlômbi nyen a bi heg mut. Jon man mee  a bi ték mbog (mbog bihégél ni mbog ndômbôl).Base i man mee i nyi le Hilôlômbi a yé i ngii bihégél gwobisôna jon ba nsébél nye le Bayemlikok. Litiñ li loñ li yé i ngii mambén momasôna. Loñ i yé  i ngii bôt bobasôna. Jon u nok le : mut a nje njék ndi mut a nje bé loñ. Yak mbén i yé i ngii bôt bobasôna. Jon bôt ba kôba ba bé yi le hémle ni mbog bi nkiha, hémle yon i mbok ane. Gwéha i nyis man mee le Hilôlômbi a yé wada. Jon bôt ba kôba ba bi kal le : i yoñ sat u nyi yon u tôgbege. U nogok ki le : ba nkés bé  mbog i ngii mbog. U sôgôk ki nok le : hikii loñ ni hé libél li kôp. Ingéda u ngwés Hilôlômbi woñ u bana yi ni pék. U ñôt mahoñol moñ ni wemede, u ntehe nkoñ hisi ni mis moñ. Jon u nok le : ñyéé i nke bé mañan matehe ngwé. Man mee a nyi le Hilôlômbi a tohol nye ni mboda  yé. Jon man mee a nlama gwés mut wé libôk kikii nyemede ndi a nogok nye ngôô. Base i bôt ba kôba i niiga we gwéha le u ba ngwélés, u ba kunde. Gwéha i mboñ we le u ño gwom môi. Base i man mee i bi gwé ingéda Hilôlômbi a bi hôla bôt ba kôba le ba yémbél gwét ni i bôt ba bégwés le ba jôp i base i baôm mbom isi. Ndi Hilôlômbi a ti bôt ba kôba mambén. Gwéha Hilôlômbi i bi nene ingéda a bi ti loñ mee nkoñ. Loñ mee i bé kunde inyuule i bé yi ndigi base i sôkbôk. Jon loñ mee i bé hol. Bon  ba mee ba bé jena bé kikii tjobi inyuule ba bé bégés ndigi Hilôlômbi nu a bi tohol bôt ba kôba i gwét ba bi jo i Ngog Lituba. I mut a ngwés Hilôlômbi ni ngui yé yosôna ni ñem wé wosôna ni mahoñol mé momasôna a yé kunde. Nseñ i gwéha i.

Yaônde, 27 njéba 2015,

                                      Nkampondipondi


 

Aucun commentaire: