ADNA
Di nla kobol i buk ini ni kal le
hala a yé i ad yom yada ni yom i pe le bi yila ngim yom yada. Di nla ki kobol i
buk ini le adna ni kal le hala a yé nôgla ni kiha ntôñ wada. Inyuu kii adna i
yé nseñ ? Adna
i yé nseñ inyuule ingéda hikii mut a niñ i yé pes, a nyi bé i yom i
ntagbe yak maaisañ.Jon u nok le : wada a kol mbada
, ibaa ba kol nhôôlak.
Adna i yé nseñ téntén ingéda ndutu tole ingéda i boñ soso jam. I yom i yon bôt ba kôba ba bi kal le :u yik, u jik, li has ndigi we. Jon munlôm a yé a adba ni mudaa le mam ma niñ
ma yémbél bañ bo, le ba yila ndigi yom yada. Inyuu hala nyen libii li ñat munlôm ni mudaa.
Inyuu hala ki nyen bôt ba kôba ba bi bot yum inyuu minson mi nwom.Jon u nok le woo wada u nkañ bé jomb. U nogok ki
le : njok yada i nkwés bé lién.
Ndutu yon i nyis mut
jam. Ndutu yon i
nti mut mahoñol méé ni i mam ma niñ ma
ngwel nye. Jon u nok le :diséé di
baa di bi kwo i bee, ndi ba bot liwanda.
Ingéda ini bôt ba édi, ba nkona ngôô. Mut a nla habé boñ maaisañ
béba. Jon u nok le : manyuñ i ngii
sa, u nje bé nges tôdô.U nogok ki le :
bo a manyuñ éé, u bénge mbus.Adna
i yé nseñ inyuu lihaa li bôt,ndap bôt, litén li bôt ni inyuu ngim
loñ bôt. Ingéda lihaa li nôgla. Ndi adna i i nke i ndap bôt, i nke litén
jap, litén li, li ntjé bé ndi li nom. Litén li, li mbéna kotba i ôô pék.Jon u
nok le : nom i yé kikii liké li
njel ndi ha bé kii i téé makôô i njel.
Koñ lôla i ñunda bés le, litén li, li édi bé, la tjé inyuule
mapanga ma moni ma njôp homa nyensôna.Ma njôp mayi
ma mbog, i base, i gwéha, i nyemb, mintuk, i sukulu, i ane i ke bisu. Litén li
édi li ntep ndigi baôma ba loñ yap i nlôñ i tuk mbañ ba nyil litén yap. Jon u nok le
: lôs i tane bé i huñguu mis.
Yom koñ lôla i ñunda ki bés, yo ini le manwin ma ntjama ni nkoñ
hisi wosôna. Ingéda litén li édi, li nimis bé mayi mé ma mbog, hop wé, libak
jé, basé yé, biték gwé, lem yé i ke bisu. Jon u nok le diuuna di yé di kotba, ndi di puuwe, ndi di sés njok. Ingéda
litén li édi, litén li li yé ngwañ. Litén li li mbana ngandag moni ni bigwel moo, yak litén li niñ, li
nyiba ni matén mape. Niñ litén li li ntjama
ni nkoñ hisi. Mut mu litén li a nla ane loñ i bôt litén li, li niñil inyuule
litén li, li nyila ngim ndémbél inyuu matén mape. Hikii yom i gwé ño.Jon u nok
le dinoo di moo di kôli bé .U
yi le, ibale bo mbôgna a nkwo, wee nyôl
u nkwo.I ngim litén, hikii mut a gwé i wé nseñ ndi
i yom i lona nyemb i ba bé jam.
Ba nyil banga litén
ingéda li mboñ bé i nlélém ihôha ngélé ibaa. Jon u nok le :hipa hada, mbek ibaa, wee u yé jôñ. Ingéda litén li édi, njel matiñ
ma bikéhene i nhas bé nye, to njel matiñ ma kokse, to njel matiñ ma nyunga, to
njel matiñ ma lôg Ngomin i ke bisu. Mimpémba mi bôt mi ngwé litén li édi, yak bôt
ba yi ni pék inyuule hala a yé kimasoda le lisañ li bôt li nyén ni adna. Hala a yé longe ni maséé. Jon u nok le : linyañ li yé matat ma ntômba. Ingéda
litén li édi, ibale bo li bak minkôm, li nyila kunde to i mbus mbôgôl nwi
ingéda mban u yé . Jon u nok le :yôi a
kal njéé, nye a njéé kéé béngba ibale bo
ndi u mbéngba bé, kindba. Masoda ni nu a ntééda biniigana ndi a kenek hi
hokok. Jon u nok le : adna i yé ngui.Adna
i nlona minson ni lipémba.
Yaônde, 01 njéba 1998
NkamPondiPondi
http://antoinepondipondi.blogspot.com
Aucun commentaire:
Enregistrer un commentaire