Yi

Yi

 

I bug ini le yi, i gwé ngandag ngobol. Ingéda mut a gwés bana yi, a ntôñ i tehe, a ntôñ i nog ngim jam, a ntoñ i nigil inyuu i gwel jam ni nyemede. Hala nyen u nléba le ba nkal le mut a nyi ngim lép. Maange manôgla a nyi bégés bagwal bé, le i yom ba nkal nye, yon a mboñ ndigi. I bug ini le yi, i nla ki nôôga le, mut a nyi ngim ngan. I bug ini le yi, ba mbôñôl yo inyuu kal le, mut a nyi ngim hop, mut a nyi ngim nson, mut a nyi ngim likañ i ke bisu. I yom u nlama tééda hana, yo ini le, ngobol i yi, dihéga di nti di nkobla le, mut a mmeya boñ ngim jam i, i mboñ le, i yom a mboñ i nene longe i mis ma bôt. Mut a nla ki yi ndutu, mut a nla ki yi liyep i ke bisu.  Mut a nla yi ngim mut le, a ntehe i mut nu. Ingéda ini, u nog mut a nkal le, a nyi habé ngim mut, hala wee a nog bé maboñog ma mut nu tole a ntañba nye tole nye ni mut, ba mbagla. Munlôm a nla yi mudaa hala wee, nye ni i mudaa nu, ba mpôôna likôndô, hala wee i munlôm nu a nañlana mudaa.

 

I pes mambén, nkéés a nla yi ngim hop, hala wee a kôli i bagal i hop ba nlona nye, hala wee a nla kéés i soman ba nlona nye. I nla pam le mut a nla bé yi gwel nyemede. Jon u nog le : ngwo i kogoo mut ni hiun hi njal. Hala a yé le, u nkoba mut ni hiun héé, u pôdôs nye, a timbhe we béba. U nla ki léba le, mut a nyi nyemede. Jon u nog le : ngwo a yi jôl jé ni ñem i nsébla. Mut a nla ki yi kadba inyuu i boñ le bôt ba yi njee a yé. Mut a nla ki yi lama i fôtô, lama i pén i ke bisu. Bôt ba nla ki yiba, hala wee, ba nleñla.

 

Ingéda mut a gwé yi, hala wee a nyi maliga ma sôli i ngim mam. Hala wee a nyi sélés boña wéé, hala wee i mut nu a nyi inyuuki a yé i niñ. I ntéñ mut ini, a mpot ndigi i yom a nyi ni biyi a bi kôhna ni ngim mam. Jon u nogle : bayi ni bayi ba kee i ket kas. U nonog ki le, hop bayi jam u nom bé.

 

Yom u nlama tééda, yo ini le, biyi bi yé i gwom u nla yi noñnnaga ni ngim jam. Inyuu hala nyen bôt ba kôba ba bi kal le, yi i yé miño mi lép, hala wee hikii mut a gwé yi. Jon u hoñol bañ le, wetama nyen u nla yi mam momasôna. U yik u yik, li has ndigi we. Kikii mut a ngwééna yi hala ki nyen, i niñ mut a niñ i nti ki nye yi. A nek wee u nôgôl likek joñ. Yi i nlôl ki maboñog moñ.

 

Yaônde, 24 Kondoñ 2006

                                                                       Nkam Pondi Pondi

                                                                       http://antoinepondipondi.blogspot.com