JÔI

Hikii jôi man Basaa a bé ti man, li bééna soso ngobol. Ngéda ihogi, li ñañal maséé to ndutu, to soso jam a mpégés mbog dilo man a ngwééne.

I jôi di mpôdôl hana, a yé nkén jôi a njôp i ndap bôt. I jôi ki lini, li bé tiba ndigi ni man munlôm inyuule nyen a bé a ntôôs bum, kikii ngén kôba le, ntôô man mayiha ma isañ.

Man muda a bééna bé ngim jôi. Jôi li isañ jon a bé a nhômna tole jôi li nlô wéé ibale bo a nke libii.

Kikii hihéga man muda nu NTAMACK a ngwal, a gwé bé jôi ba nsébél nye le Ngo NTAMACK, hala wee ngond NTAMACK. Ibale bo, bon bôda ba NTAMACK ba ntôl ndi NTAMACK a bag mut ñaamb, ba nkahal séblene i bon bôda bana ni njel môi ma banyañ.

Hala kikii môi ma bééga, mape bisai, mape biog, jon man Basaa i lole a nti man jôi, a bé a kés ngambi i nya i yéle, ngim môi i bi tjé i ngim ma ndap mahogi inyuule ma bééga biog. Man Ba­saa a nke i ngambi ingéda nwa a yé jém inyuu i yi le man nu a ngwéé a ba i niñ. Ingéda Man Basaa a nyéñ mu i gwom bi, i yom a nléba i yé i ntéédaga lisol le tee i pam i yaa man (hala wee dilo ditan inyuu man mulôm, dilo dina inyuu man muda), ha nyen to nje mut (bonge ni bôda) a bé nôgôl i jôi bayi ba bi léba.

I yimbne ini ba bé léba i bééna soso ngobol. Mut a yé a pohol jôi li mut, ha nyen a oo nye man.

Môi ma bé ke ingéda i ni mam. Bôt ba bé o bé mut man yanga, a ba bé mut lihaa, wee a yé mbombog, wee a yé kiñe, wee a yé banga yéé liwanda.

I jôi ba o mange, mange a nyi inyuu ki ba oo nye i jôi li, yag litén inyuu ki ba o i jôi li.

Ingéda mut a yé kunde ha nyen a oo man ni bini gwom bipe môi.

Ingéda kôba, ndi isoñ a biine we nwa, ndi nwa woñ nu a gwal man, u gwé bé kunde i oo man nu jôi le tee isoñ a wo.

Ligwé, sôble, jôi

Ingéda man a mpam le yaa yé i yé len (hala we dilo ditan inyuu man munlôm, dilo dina inyuu man muda), ba nyoñ malép ma ba bé nughene nye, nye nkéñeé man.

Ba kôp i ngii nyôl, malép ma kôp nye i nyuu. Sôble yé i. Ha nyen i bôt ba bé ha ba nyi i jôi ba nti man.

NGéDI TOLE NGUu

Mut nyemede a nla leñba ngédi tole nguu. Bôt ba nla ki leñ mut ngédi tole nguu inyuu unda libag li mut nu (minson nwéé minlam to mimbe). Jon ngédi i yé yimbne ba nkônde mut i jôi ba bi o nye./.

Ndôg Tjok (banit ngii)

Lôg Ngônd (Bam njok)

Lôg Baék (Miñyéé mi kôi)

Ndôg Kôbe (Pôla maloñ)

Ndôg Tindi (Hôgbe maloñ)

Ndôg Njee (Hotbe li loñ)

Ndôg Sul (Ntumba tôñ)

Ndôg Batjék (Ngônd Njok)

Yaônde, 03 kondoñ 1987

Nkam Pondi Pondi

http: ||antoinepondipondi.blogspot.com