NGWAGA
Di nla kobol i
buk ini ni kal le hala a yé makidig loñ i nkit inyuu mut a mbôk mbén. Hala a yé
ngim kokse loñ i nkokse mut i ngeñ mut a mbôk mbén ikété mabogog ma mam ma man
mee. Man mee a bééna i méé makenek ni méé mabogog ma mam. Mabogog ma mam ma, ma
bé bénge i bôdôl bijek man mee a bé je, kikii bo péé, bo mbom, bo kul i ke bisu
ni ngim bikila liniñig li mut ikété libôk jéé. Jon to i we nu u yé isañ mbai le
u gwé bôt u nkena, u nyi kikii hihéga le ibale u nol mbom, mbom i yé yom lilôm le mut a nje bé yo nyetama. Jon
mut a mbénge njee a yé nkugi bum le a sul nye mbom a nol. Yak nkugi bum a
mbénge b’a mbombog a ta bé hana i bum ini. Ibale mbombog a ta bé hanyen a nyén,
a kap mbom yéé, a om mbom yéé hikii ndap bôt jéé libônga. Hala wee hikii ndap
bôt i gwé i jéé jomb.
Jon
nsude mut i koli bé i ha mut i ngwaga inyuule a nyi bé lelaa ba nla pémés i mut
nu i ngwaga. Hala a yé jam li mbombog nyetama. Mbombog a nla ha mut i ngwaga
ibale nkugi bum i nsoman mut wé i loñ. I mut mbombog a nha i ngwaga ndi u boñ
jam ni nye, mbombog a nla ha we i ngwaga.
Mbombog
le mbombog, nkugi bum le nkugi bum. Mbombog a yé inyuu loñ yosôna. Nkugi bum won i nkena ndap bôt. Jon mbombog a nla bé jôp
i yañan bum ibale bo ba nsébél bé nye (nkugi bum). Nkugi bum a nlo i sébél mbombog
ni kôp magwel ma ndap inyuu i sôgôô nye maôô ni léda i tan i maog ma maén. Hala
nyen a loo i ngéda kôba. Mbombog a nyap bé lép hala wee a njôp bé i yañan bum.
Masoda
ni nu a nkil hi kokok.
Yaônde, 05 biôôm 2013
Nkam PONDI PONDI
http://antoinepondipondi.blogspot.com
Aucun commentaire:
Enregistrer un commentaire