lundi 28 octobre 2013

NKUGI BUM


NKUGI BUM

Di nla kobol i buk ini ni kal le hala a yé ngim mut i nkena ngim ndap bôt. Inyuu hala nyen minkugi mi bum mi ta bé imaa i ngim ndap bôt.
Nkugi bum nyen a nla kena mut ndap yé bôt i loñ le loñ i kokse nye. Jon u nog le: hikii mbai ni wé ñem kédé ngii.Hala wee mut a jôp bañi yanan bum. I mut a nyoñ makidig inyuu ngim mut nkugi bum a nkena bé i loñ, a mbôk mbén. Nkugi bum u kôli i tjel noñ makidig a nyoñ noñnaga ni mut a yé i bum yé. Yom u nlama ki yi yo ini le, i mut a njôp i yanan bum a kôli ni kokse. Loñ i nkokse nye inyuule a nlona yubda ni i mam mbog mee i bi bok, a nyan nkugi bum. Hala wee a nyan tel i nkugi bum bôt ba kôba ba bi yigle loñ mee.
Ingéda mut a nlona we kaat soman, u nlama wan inyuu i yi to i mut nu a yé nkugi bum tigale u begee i joñ. Jon u nog le: ngi-yi a nkwéha nkaa. Hala wee ingéda u nyi bé u nkwo nkaa. Mut a ta bé i ngii mbén i mbog mee.
U tééda le: nkugi bum le nkugi bum. Nwet bum le nwet bum. Ibale bo nwet bum a soman mut i loñ, loñ i ntibis soman yak nkugi bum hala wee i ndap bôt.
Masoda ni nu a nkil hi kokok.

Yaônde, 20 dipos 2013
Nkam PONDI PONDI
http:/antoinepondipondi.blogspot.com



Aucun commentaire: