LIKE NI HILÔLÔMBI

LIKE NI HILÔLÔMBI

 

            Ingéda mut a nke hala wee a téé bé, hala wee a nke ni bisu, hala wee a nyigis makôô mé ni moo mé. Ingéda mut a neebe ke ni Hilôlômbi, hala wee a neebe niñ ni mambén ma Hilôlômbi, hala wee a gwé bôdôl ni Hilôlômbi, hala wee a nti Hilôlômbi mbôgi, hala wee a neebe ke i longe njel. Jon di nla kal le a nhémle Hilôlômbi.

I mut a nke ni Hilôlômbi wee a neebe le Hilôlômbi a gwel nye i woo, le nyen a kena niñ yé. Hala  wee yag mahoñol mé,Njombongo nyen a nkena mo. Inyuule like ni Hilôlômbi hala a nkobla ki le u nke ni nye i pes i mahoñol le u nkônde bana yi ni pék. Batuupék a nhôya bé we. U nyila hiôdôt hi mbai to lisuk joñ li niñ inyuule Hilôlômbi a nsayap i bôt ba ba nke ni nye ni bôt ba nyéñ nye. Kimaltjai a ñunda we hala niñ yoñ i nkoñ biték ni i nkoñ bawoga.

Imut a nke ni Hilôlômbi a yé mut a nkal nye mam mé malam ni mam mabe a mboñ. A nyi le yom i nkomol bé Bayemlikok.Jon a nigbene Hilôlômbi. Mut a nke ni Hilôlômbi a tabé mut yengi, a yé mut a gwé mban, a nyi ki le a nlama yônôs i jam a mbôn.

 

 

Yaônde, 06njéba 2009

Nkam PondiPondi

http://antoinepondipondi.blogspot.com