jeudi 28 septembre 2017

NKANA A NYOGOP BÉ, IBALE A NTILA BÉ, A ÑAÑ


NKANA A NYOGOP BÉ, IBALE A NTILA BÉ, A ÑAÑ



I bug ini le nyogop i nlôl i bug ini le yôgi. Hala wee ibale mut a yé nhat mut, a nyéñ  habé jam jo kii jo, inyuu yé a ma bol.
Matila ma nhôla mut le a nlôôs mahoñol mé, yi yé ni pék yé i bôt ba ñañ nye len ni i bet ba añ matila mé i mbus nyemb yé.
Jon u nog le : hop u ntagbe, matila ma nyégle.
Ingéda mut a ñañ, a nkônde bana yi ni pék. Jon u nog le : yi i ngi kônde i nteg bé mal. Ingéda u ntila ndi u añag u nyila ngwélés. Nlélém inuyu loñ yoñ.
Mut a nigil ni sal ngim yé niñ yosôna.
Ibale bo a ntila bé hop wé tole a ñañ bé wo, a nyin. Yak loñ i nyiñ. A nyi habé ôô bisélél gwé, a nsal habé bijek gwé ni nuñul gwo ni nkoñ isi, a mbañ habé bee gwé i ke ni bisu. A nyi habé nseñ i manyii. Jon man mee a mbôdôl nuñul biték gwé mut a tabé man mee, munlôm a mbôdôl haba mbod mudaa yak mudaa a mbôdôl haba mbod munlôm, man mee a mbôdôl je bijek ni nyo maog ma loñ i ñane nye, a ntjél liada li bôt ba kôba ni Hilôlômbi, a ntjél bégés mambén ma loñ mee, a njôp i njel bitek, a mpot habé hop wé i ligwéyag, a nsehla ingéda ba ntég bijek ni maog i téblé i ke ni bisu.
A man mee inyuu kii u gwé habé suhul nyuu ? Inyuu kii u ntila bé ? Inyuu kii u ñañ bé ? Inyuu kii u nim litén joñ ni mboda yoñ yi yoñ ni pék yoñ ? Inyuu kii man mee a ñañ bé lipep li manwin hikii kel ? Ngim kaat hikii sôñ ? Inyuu kii man mee a nyila mut njagi ? Inyuu kii man mee a ta habé mut mban ? Inyuu  kii man mee a ntéd libind jé nyemede ? Inyuu kii man mee a nyi habé wonyuu ingéda a mbep boñ ngim jam ? Inyuu kii man mee a gwé habé yi ni pék yosôna ?


Yaônde, 26 biôôm 2008
Nkam PONDI PONDI

http//antoinepondipondi.blogspot.com

Aucun commentaire: