LIYI YÉN I TÉBLÉ I JE

Iloa man mee a bé a jôwa moo, a soohe Hilôlômbi ndi to a mbôdôl je bijek.

I nwaa u nyén i téblé i je, u nke i yoñ bijek tole ba nték we bijek. Liyoñ bijek li nkal bé le u hak i séya yoñ, u hak ki i nlélém ngéda i wagawaga.

Ingéda u nyi yén i téblé i je, hala a nkobla le u nti i bôt ba yii ni we lipém. Liyi yén i téblé i je li mbôdôl ni liyi téé nyuu yoñ. U nlama yén i nya i yé le makôô moñ ma bag we mbogog longe, mboñngo i nlama hoi, bituu gwoñ bi bag  sép i ke bisu. U nlama hihe

maboñga moñ ma woo mbeñel i ngii téblé, bipes gwobiba biséya yoñ. Woo woñ to liboñ joñ li woo bi tihba bé téblé i je. Bagwal i loñ yés ba mbéna bé je ni bon bap. Hala a tabé longe jam. Inyuu hala nyen u ñada mut a nyi bé kikii a nlama je bred. Ba nkit bé bred ni hikéñ i ngéda u nyén i téblé i je. Ba mbek bred, ba ñôm bé nwas i bred. Jon pô i wog, minson mi yihga.

 

Ingéda u ngwélél hikéñ, u ngwel hikéñ longe ligwelek le ñunda manjel a nlama bé tihba maloo ma hikéñ. Nyo woñ i nlama bé tihba maloo ma hikéñ. U nlama bé sas maloo ma hikéñ. Yom mut a mboñ yo ini le, a nhéña  nhikéñ.

Ingéda u ngwélél tôk, u ñôt bé mbit to huwe wo. U nlama bé yônôs tôk i loo hihéga tiga le mbit u sôbi. U nlama lona tôk i nyo woñ inyuu le u uwe bañ ño woñ ngandag.

Ingéda u ngwélél  nwas, masôñ ma nlama bénge i ngii.

Bôt ba kôba ba bé bañ tôk likôl, séya likôl i ke ni bisu.

Tômblô yoñ i nlama bé ba nyonog i nya i yéle maog ma nsôbi. U nlama bé kubla maog. U nlama nyo ndék, u nték tômblô ndi u kônde ki nyo maog moñ. U nlama bé ôt maog.

Napken i je i yé yom matadga. I tabé yom ba nséhél jôl to su i ke bisu. Napken i yé yom ba mbii i ngii maboñ tole bebee ni séya. Napken i nla hôla we le u sas nyo woñ ilole u ngwélél tômblô yoñ. I ngéda u nyodi i téblé i je, u nyék napken bebee ni séya yoñ ngiôdôk.

U nlama nyambaa bijek gwôñ i nya i yéle u ntéñnga bé i bôt ba yii ni we i téblé i je.

U nlama bé pot ni bijek nyonog i nyo. Ingéda u nje, u nyip nyo.

Ingéda u mal je, u mbii hikéñ, nwas ni tôk i ngii séya yoñ i nya i yéle  yom yada munu i tabé i ngii yom ipe.

U tééda ni le, lije hobi li gwé ngim likenge kikii lije kul, péé, mala, mabem, koo, likubé, tôñ lilañ, manga, piya i ke ni bisu.

 

 

Yaônde, 09 libui li ñyéé 2001

Nkam pondi pondi

http://antoinepondipondi.blogpot.com