Di nla kobol i bug ini le mahol ni kal le ingéda u gwé bé yom ndi u kôs yom i yé we nseñ nyem ba nkal le mahol ma yé. Man a nhol hala wee a nnañ, a nkônde ntel, tum ni yi. Ligwañ li nhol hala wee ngwon bi kônde mu ligwañ li. Mahol ma nhôla we le u kôs bigwel moo bi bi lémés ni tômbôs we niñ. Kikii ihéga, u kol bie ni nkuleñ. Ingéda wa bôdôl kol ni isoo i nke ni belesiñ, wee u nhol. Ibale bo u nonul makondo imaa ndigi, u nla ndigi som bipaga bebek ngélé yada i ngim sôñ. Ibale bo u nla ñuñul 20 000 ma makondo, u nje bipaga hikii kel, u nla saa matibla mon wemede ibale bo ndi u mbeha kon, u nla somb nuga, wee u nhol. Ingéda u gwé bigwel moo u nla gwal ngandag bon i lel batan.
Di nla kobol i bug ini le libag ni kal le, li yé yom i nom.
Inyu i boñ le mahol ma ba , i nsôbla le loñ i ôô ligwañ jap hala wee gwom ba gwés ni bisélél bi gwon bi, i nsômbla ki le, bon ba loñ ba nognaga ngôô, ba téédaga libag jap li ngwélés. U nlama ôô bisélél gwon ni nuñul gwo ni nkoñ hisi. U lama je bijek ni nyo maog moñ ndi u nuñlag gwo ni nkoñ hisi. Inyu hala nyen u nlama jés boña woñ ni i jel ini le ibale bo ndi u nkal le u mbel makondo, u nlama nuñul môm ma ma dikôô ma makondo i ngim nwii i len ini. Ibale bo ndi u nkal le u mbañ makôô ma matôwa, u nlama ban didun ditan di makôô ma matowa i ngim nwi, i nlélém jam ibale bo ndi u nkal le u bañ minkuu mi bitidii i ke ni bisu. U nlama bana nduña inyu hop woñ i ligwéyak, jon u nlama añ bikaat to mapep ma nwin ma yé tilga ni hop i mee hikii kel. U nlama bañ gwee gwoñ ni nuñul gwo ni nkoñ hisi, u nlama bot dikuu di moni inyu i bana moni. Bakana ba Mbengue ba bép bés gwét inyule ba bana ngaa i nleñ makoñ imaa i nlélém ngéda. Jon mahol ma nla ba ingéda man mee a nyéñ i tehe mam momasôna, ingéda man mee a nyéñ i nog mam momasôna, ingéda man mee a nyén i bana ndoñol i mam momasôna. U nlama ôô bisélél bi bi nyilis we kunde. Ngond mee i nlama gwal bon batan bititigi gwobisôna ibale bo mbôô wéé i nténga bé nye. Bilog bi nlama bii ni gwal bon batan bititigi gwobisôna.
Man mee a nlama bégés ligwé jéé li mbog ni i bôt ba yé i no i mbog mee. Ingéda bôt ba kôba, ba bé yil man mee ni bilem bini le: gwéha, maliga ni ômsiñ.
Jon bon ba mee ba jo sañ le ipam i nwi 2014, hikii mbai loñ mee i bana mapubi, malép ma nyo, sukulu, ndap matibla ni nloñ i bag nsénék. Inyule pot ni boñ mam ma imaa. Inyu hala nyen man mee a jôp i boma i mahol. Man mee a yi le a nlama hôla maisañ.
U hôya bañ mambén ma Hilôlômbi inyu i sayap nson woñ u mahol. Mbén Hilôlômbi i bisu i nkal le, u je bañ bijek, u nyo bañ maog ma loñ i ane we, tiga le u yila nkol i loñ i. Mbén i yôhne i baa i Hilôlômbi, i nkal le, a man mee u nuñlene bañ biték gwoñ mut a tabé man mee. Mben i yôhne i aa i Hilôlômbi i nkal le, munlôm a haba bañ mbod mudaa to mudaa a haba bañ mbod munlôm. Njangi ni kôle moni bi nlama bé mal i boma i litén. I loñ i mbégés bé ngeñ i nhol bé.
Yuônde, 04 kondoñ 2004
Nkam pondi pondi
http://antoinepondipondi.blogspot.com
Aucun commentaire:
Enregistrer un commentaire