vendredi 6 août 2010

NYUNGA NI LUGNA


Ingéda bôt ba kôba ba bi neebe Hilôlômbi kikii NTOHOL wap, i gwom ba bé ôô, ba bé nuñul gwo inyu i bana moni yag bijek ba bé sal. Bisélél gwap bipe ba bé lugna gwo ni gwom bipe bi bé bo nseñ. Inyu i boñ i mam mana, ba bé noñ manjel ma hisi hala wee ba bé ke ni makôô map tole ba bé jôp i môngô. Hala nyen bibôm bi bi gwé i ngim mambai yag hilo hi bôm. Hala wee ngwa jôn. I bôt bana ba bé sal i nson unu, bon ba bi boñ le base i sôkbôk i yiba ni biniigana bi Hilôlômbi. Hala nyen minlôn mi nyunga mi bi gwé yag bôt ba kôba ba bé sal ngandag inyu i ôô bisélél gwap ni bana ngandag bijek ni bilém le mut nyekinye a yep bañ ni jis li mbôngôô.

Yi ni pék bôt ba kôba ba bé gwé, bi bi kônde nañ inyule ba bé sélés baboña bap inyu i bañ bee bi matibla, inyu i ôô bilonge bi bisélél i ke bisu. Bôt ba kôba ba bé yi le nson u nyilis mut ngwélés. Nson u nlona mahol. Hilôlômbi a nsayap i mut a nsal. Jon bôt ba kôba ba bé kéne mangén, masak map ma bé mbogog, dingangana di bé niiga bôt i mam malam ba nlama boñ inyu i niñ longe i ke bisu.

Hilôlômbi a bi hôla bôt ba kôba le ba yi bok mam map ma nyunga ni ma lugna.

Yaônde, 28 hilônde 2010

Nkam Pondi Pondi

http://antoinepondipondi.blogspot.com

Aucun commentaire: