SAI

Hala a mbéna ba jam li base le Hilôlômbi a hôla we, le u jôp isi mapabai méé, le u nigbene Hilôlômbi woñ. Ingéda mut a nyéñ bisai hala a nkobla le, a ngwés le ba ban nye. Jon ba nla sayap mange, ba nla sayap nson, ba nla sayap bijek i ke bisu. Jon ingéda u nog le, man i moo, man libum, hala wee bisai bi, le muda a kônde gwal ndi a bot. Le niñ i kônde ke ni bisu.

Bisai bi béé bé tjagatjaga. To njee mut bé nyen a kôli i ti bisai. Maboñog ma mut mon ma mboñ nye a kôs bisai. Jon u nog le bisai bi noñ mange manôgla. I mut nyemede a nti bisai, a nlama ba mut Hilôlômbi a nsayap inyu i boñ le bisai gwé bi yon. Inyu hala nyen u nog le, ba ñog bé i nsaibag. Hala wee, ibale bo mut a bi gwéé le a yé ntôô mut, biog bi bôt ba binam bi nhôla bé nye to jam, bi ntihba bé nye.

Ingéda u nog le, me nsayap we malo malam, hala wee me nkon maséé i tehe we. Ingéda u nog le me nsayap we nwi nlam, hala wee bot yem ñem i yé le i nwi yondo ini i lona we bilonge bi mam.

Ingéda u nog le, me nsayap we liké lilam, hala wee bot yem ñem i yé le, liké joñ li tagbe longe ni le mu i njel i, u nke, u kôs nkus. Ingéda u nog le, ba nnaña sai, hala wee ngim jam i nke bé ndi bôt ba nkodba inyu i yi kii i nkogoo ndi yambag i lek. Mu i njel i nyen u nla nog le ba nnaña sai i mut a nkon inyu i boñ le a mbôôp. Yom u nlama ki tééda, yo ini le, ingéda u ngwés sayap mut, u nlama yi mbôgi yéé. Wip i sai i mbahal bé to jam.

Yaônde, 25 kondoñ 1999

Nkam Pondi Pondi

http://antoinepondipondi.blogspot.com