LIKÉ

Ingéda mut a nke, hala a nhoñlaha nye le a téé bitédée. Ingéda mange a mbôdôl liké, hala wee a mbôdôl niñ. Jon mut a nla bat we le, i nke laa, inyu i yi mbôô woñ. Liké li ntinde we le u kee yak mut numpe. Jon mut a gwé ngim likenek bôt ba nyil nye, i, i nlémél ki ngim bôt.

Liké li mboñ mut le a bana suhul nyuu. Jon u nog le, u nkenek ngwéé, u nket bé jin tole u kenek i njagi, u begee bé bot. Liké li mboñ mut le a yi jés boña wéé ni i njel ini le a nyéñ i yi mam tole a nyéñ i toñol mam. Jon u nog le, u kenek i lép, u lel bé lép. U nogog ki le, u kenek homa, u koba ba mpes yom, u tihba bañ yo ni moo. Liké li mboñ mut le, a nyoñ ngéda inyu i ôt mahoñol. Jon u nog le, jala nye liké li yé me ntandaa, ndômle a yé lila. Liké li mboñ mut le a yi bégés ngeñ. Jon nog le, u nsas yeb ingéda u nyodak. Liké li mboñ mut le a hôlôs nyuu ingéda a ngwés boñ jam tiga le a lo kikii jomb a loo i juu.

Ibale bo ndi u nke mbeñel, wa bol ndigi i homa u nke. Jon u nog le, u kenek, u lalak a yémbél ntôndôô liké. Ingéda we ni mut ni hôm, ni ñañal bé mam momasôna. Jon u nog le, kul nye mbegee dibee kila hiol. Niñ mut yon i nti nye mahoñol a gwéé. Jon u nog le, ñyéé a nke bé ngwé mañan matehna.

Ingéda u nke, u mbôk bisu, bôt ba ñemble we. Kel yada, wa bet makala ma ane ni ma lipém. Jon u nlama tjél liké li ba ñane we le u yila nkol.

Ingéda u nke liké hisi, matjél ma nhôm ni nyuu yoñ yôsôna. Hala a mboñ le u nkônde bak nyemb. Di nnok le yak bakugi ba nke, hala wee ba nhôm.

Jon u tééda le, like li yé soso sukulu inyu niñ i mut ki.

Yaônde 15 hikañ 2004

Nkam PONDI PONDI

http://antoinepondipondi.blogspot.com